काठमाण्डौ – साझा पार्टीले आफ्नो केन्द्रीय समितिमा दुई जना नयाँ सदस्य थपेको छ । सोमबार बसेको केन्द्रीय समितिको बैठकले रजनी केसी र शरदराज पाठकलाई केन्द्रीय सदस्यमा थपेको हो ।

लामो समय नेपाल विद्यार्थी संघ र महिला संघमा क्रियाशील रजनी केसी कास्कीमा सामाजिक अभियानकर्ताका रुपमा चिनिनुहुन्छ । कुशल वक्ताका रूपमा पनि ख्याति कमाएकी ४४ वर्षीय केसीले पुरानो राजनीतिबाट देशको रूपान्तरण सम्भव नै नभएको भन्दै साझा पार्टी निर्माणमा पूर्ण रूपले संलग्न हुन गएको महिना पोखरा विश्वविद्यालयको उपप्रशासकको पदबाट राजीनामा दिनु भएको थियो ।

उहाँले जनसंख्या, लैङ्गिक अध्ययन तथा विकासमा स्नातकोत्तर गर्नु भएको छ ।  आउँदो मंसिर १४ गते हुने उपचुनावमा कास्की क्षेत्र नम्बर २ मा रिक्त रहेको प्रतिनिधि सभा सदस्यमा रजनी केसीलाई साझा पार्टीले उम्मेदवार बनाउने चर्चा रहेको छ ।

चालिस वर्षीय शरदराज पाठक स्थापनाकालदेखि नै साझा पार्टी निर्माणमा सक्रिय हुनुहुन्छ । ग्रामीण विकासमा स्नातकोत्तर तथा अर्थशास्त्र र अंग्रेजीमा स्नातक गरेका पाठक पूर्व पत्रकार हुनुहुन्छ । उहाँले अष्ट्रेलियामा रहँदा अष्ट्रेलियाको नेपालीपत्र साप्ताहिकका संस्थापक सम्पादक भएर काम गर्नु भएको थियो ।

साझा पार्टीमा पूर्ण रुपमा संलग्न हुन हालै उहाँले विभिन्न पेशागत जिम्मेवारीबाट राजीनामा दिएका छन् । पाठक कुशल वक्ता हुनुहुन्छ र उहाँ गएको आम चुनावमा पार्टीको तर्फबाट चितवन क्षेत्र नं ३ का उमेदवार हुनुहुन्थ्यो ।