केही कुरामा पेलेरै भए पनि निजगढ विमानस्थल बनाउनुपर्छ, काम सुरु गरियोस् : विज्ञ

मंसिर २२, २०७६ आइतबार ५:५९:२७ | उज्यालो सहकर्मी

काठमाण्डाै - निजगढ अन्तर्राष्ट्रिय विमानस्थल आयोजना रुखको विषयलाई लिएर फेरि भूमरीमा परेको छ । रुख काटेर र चराचुरुङ्गीको बास मासेर विमानस्थल बनाउन नहुने भन्दै दायर भएको रिटमा सर्वोच्चले प्रारम्भिक सुनुवाइ गर्दै तत्काललाई काम अघि नबढाउन आदेश दिएको छ ।

तर यो विमानस्थल देशकै विकासको मेरुदण्ड भएकाले कुनै पनि हालतमा रोकिन नहुने विज्ञहरुको भनाई छ । जसरी रुख काट्दा जंगल विनाश भएको छ भनेर बहस भैरहेको छ त्यसैगरी निजगढमा विमानस्थल बन्दा त्यसले देशको मुहार फेर्छ भनेर बहस चर्काउनुपर्ने उनीहरुको भनाई छ ।

अन्तर्राष्ट्रिय नागरिक उडड्यन संगठनको ७५ औं स्थापना दिवसको अवसरमा नेपालको हवाइ नीतिबारे भएको छलफलमा धेरैजसोले निजगढमा केही रुख काटिने बहानामा विमानस्थल बनाउने काम नरोक्न सुझाव दिएका छन् ।

तत्कालिन हवाइ विभागका पूर्व महानिर्देशक हरिभक्त श्रेष्ठले भन्नुभयो, ‘निजगढ विमानस्थलको लागि अहिलेका महानिर्देशक रिटायर्ड हुने बेलासम्म पनि रुख काटिन्छ कि काटिन्न भन्ने अन्योल भएको छ, मलाई कुनै कुनै चिज के लाग्छ भने देशको हितमा कुनै कुरा छ भने हामीले पेलेरै भएपनि निर्णय गर्नुपर्छ, चाहे भ्याकेटमा जानुस या अरु गर्नुहोस, अलमलमा बस्नुहुँदैन, रुख काट्न सुरु गर्नुहोस, काम सुरु गर्नुहोस ।’

निजगढ विमानस्थल राष्ट्रको गौरव भएको र हवाइ पूर्वाधारमार्फत देश सम्बृद्ध बनाउने आधार भएकाले यसलाई सरकारले अघि बढाउनैपर्ने उहाँको भनाई छ ।

यस्तै कार्यक्रममा नेपाल नागरिक उडड्यन प्राधिकरणका उप प्रबन्धक द्धारिका भट्टराईले पनि सरकारले राष्ट्रिय आवश्यकताका आयोजनाको लागि दृढ अडान लिनुपर्ने बताउनुभयो ।

‘सर्वोच्चले काम अघि नबढाउनु भनेपछि केही मान्छेहरु अब त काम अघि बढ्दैन भनेर मख्ख परेको देखिएको छ तर हामीले निजगढको बारेमा धेरैलाई बुझाउन नसकेर यो समस्या आएको हो’ भट्टराईले भन्नुभयो, ‘जसरी निजगढमा रुख काट्दा श्वास फेर्नै सकिन्न भनेर एकथरीले हल्ला गरिरहेका छन्, हामीले पनि निजगढमा विमानस्थल बनाएमा यसले देशको मुहार फेर्छ भनेर प्रचार गर्नुपर्छ, यहाँ बोल्नेको पिठो विक्ने त हो ।’

उहाँले अन्तर्राष्ट्रिय विमानस्थल दूर दराजमा बन्न सक्दैन भन्ने सन्देश फैलाउन पनि जरुरी रहेको बताउनुभयो ।

‘खाली जग्गा छ भन्दैमा दोस्रो अन्तर्राष्ट्रिय विमानस्थल हुम्ला जुम्लामा बन्न सक्दैन, यसको लागि पनि मापदण्ड छन् भनेर हाम्रा विज्ञहरुले बोल्दिनुपर्‍यो, अदालतका न्यायाधीसलाई यो विमानस्थलको ब्यापक फाइदाबारे जानकारी नै छैन होला, तर हामीले यसलाई बुझाउनुपर्छ ।’ उपप्रबन्धक द्धारिका कोइरालाले भन्नुभयो ।

अन्तिम अपडेट: पुस ३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्