दीक्षान्तमा पदक पाउने विद्यार्थी भन्छन् : देशमै सेवा गर्ने हाे

पुष ३, २०७६ बिहीबार १९:३२:५९ | रासस

काठमाण्डाै - त्रिभुवन विश्वविद्यालय (त्रिवि)बाट विभिन्न विषयमा उत्कृष्ट स्थान हासिल गर्न सफल विद्यार्थीले अध्ययनपछि नेपालमा नै सेवा गर्ने बताएका छन् ।

त्रिविको ४५औँ दीक्षान्त समारोहमा चान्सलरसहित तीन पुरस्कार पाउने विराटनगरका उमेश आचायले भविष्यमा नेपालमै सेवा गर्ने बताउनुभयो । अहिले नेपाल टेलिकममा वरिष्ठ इञ्जिनियरसमेत रहनुभएका उहाँले भन्नुभयो, 'अहिले पनि म सरकारी सेवामा छु, यही सेवामा रही देशको सेवा गर्ने हो ।' मेहनतको फल पदक पाएपछि राष्ट्रिय भाव अझ जागृत भएको महसुस आफूलाई भएको उहाँले बताउनुभयो ।

पुल्चोक इञ्जिनियरिङ क्याम्पसबाट स्नातकोत्तर तहमा ९१.७३ प्रतिशत अङ्क ल्याउनुभएका आचार्यले दीक्षान्त समारोहको ठूलो पुरस्कार चान्सलर पदक पाउनुभएको छ । चान्सलर पदक त्रिविमा सर्वोकृष्ट अङ्क ल्याउने विद्यार्थीलाई प्रदान गरिन्छ । सो पदकमा करीब तीन तोला सुन रहेको हुन्छ । चान्सलरसहित उहाँले त्रिवि प्राध्यापक संघ स्वर्ण पदक र रामप्रसाद मानन्धर स्वर्ण पदक पनि पाउनुभएको हो ।

यसैगरी अर्का तीन पदक प्राप्त गर्नुभएका विद्यमान महताराले पनि देश र समाजको सेवा गर्ने बताउनुभएको छ । अहिले नेपाल राष्ट्र बैँकमा सहायक निर्देशकको रुपमा कार्यरत रहनुभएका उहाँले मुलुकमा काम गर्ने वातावरण बन्दै गएकाले यहीँ रहेर सेवा गर्ने सङ्कल्प गर्नुभएको हो ।

'पहिला बाहिर जाने सोचमा थिएँ', डोल्पा जगदुल्लाका महताराले भन्नुभयो, 'नेपाल राष्ट्र बैंकमा नाम निकालेको र दीक्षान्तमा पनि पदक पाएकाले देशमा रहेर नै सेवा गर्ने इच्छा जागेको छ ।' अर्थशास्त्र विषयमा स्नातकोत्तर तहमा ३.८६ सीजीपीए ल्याई सर्वोकृष्ट हुनुभएका महताराले आज खगेन्द्रमानसिंह प्रधान पदक, तारापद चौधरी पदक र चन्द्रराज ढुङ्गोल स्मृति पुरस्कार पाउनुभएको छ ।

यसैगरी दुई पदक प्राप्त गर्नुभएका सगीना महर्जनले पनि नेपालमा नै सेवा गर्ने इच्छा रहेको बताउनुभयो । अहिले चावहिलस्थित डियर वाक कलेजमा अध्यापन पेशामा आवद्ध हुनुभएका उहाँले आफ्नो क्षेत्रको काम अहिले प्राप्त नभएकाले विदेशमा गई विद्यावारिधि गरेर नेपालमै काम गर्ने बताउनुभयो ।

रसायन शास्त्र विभागबाट एमएस्सीमा ३.९८ सीजीपीए अङ्क ल्याउनुभएका महर्जनले अमृत पदक र पीएमसी पदक प्राप्त गर्नुभएको छ । त्यस अवसरमा सर्वोकृष्ट अङ्क ल्याउने विद्यार्थीलाई ३१ पदक/पुरस्कार प्रदान गरिएको थियो । थमनसिंह गौतम, इशिला खरेल र अञ्जना शर्माले दुई/दुई पुरस्कार पाउनुहुने भएको थियो ।

स्नातकोत्तर तहमा राजनीतिक शास्त्रमा ६७ प्रतिशत ल्याउनुभएका गौतमले ‘ललित चन्द पदक’ र वडाकाजी ‘मरिचमान सिंह पदक’ पाउनुभएको छ ।

शङ्करदेव क्याम्पसबाट व्यापार प्रशासनमा स्नातक तह (बीबीए)मा ३.९३ सीजीपीए अङ्क ल्याउनुभएका खरेलले भाइस चान्सलर पदक र भ्वाइस सत्य माँ स्मृति स्वर्ण पदक र मानविकी सङ्काय स्नातक तहमा उत्कृष्ट अङ्क ८२.१४ प्रतिशत ल्याउने सान्त्वना मेमोरियल बहुमुखी क्याम्पसका विद्यार्थी शर्माले पिपल्स क्याम्पस ‘तीर्थरत्न बज्राचार्य पदक’ र ‘ज्ञानप्रसाद’ पुरस्कार पाउनुभएको छ ।

दीक्षान्त समारोहमा विद्यावारिधितर्फ ८५, एमफिलतर्फ ४०, स्नातकोत्तर तह तथा स्नातक तह उत्तीर्ण गरेकामा कृषि तथा पशुविज्ञानमा १३२, शिक्षा सङ्कायमा ७७१, मानविकी सङ्कायमा दुई हजार ९१, इञ्जिनियरिङ एक हजार १८६, वन विज्ञान ३३, कानूनमा १८०, चिकित्सामा ८६४, व्यवस्थापनमा तीन हजार ७०३ र विज्ञानमा एक हजार ९८ विद्यार्थी दीक्षित भएका थिए ।

समारोहमा १० हजार १८४ विद्यार्थी र करीब छ हजार ९०० अभिभावक सहभागी थिए ।

अन्तिम अपडेट: कात्तिक १६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्