पश्चिम अफ्रिकाका केही देशमा पछिल्लो दुई सय वर्षयताकै धेरै गर्मी
बैशाख ६, २०८१ बिहिबार
काठमाण्डौ - अर्थमन्त्री डा. युवराज खतिवडाले लेखापरीक्षकहरुलाई मूल्य मान्यताभन्दा विपरीत नक्कली कम्पनीहरुको लेखापरीक्षण नराख्न आग्रह गर्नुभएको छ ।
‘इन्ष्टिच्युट अफ चार्टर्ड एकाउन्टेन्ट नेपाल’द्वारा आयोजित ‘प्रोफेसनल इन्टिग्रिटी फर कम्ब्याटिङ करप्सन एन्ड फ्रड’ विषयक सम्मेलनमा उहाँले कम्पनी स्थापनाको उद्देश्य र व्यावसायिक क्रियाकलाप बुझेरमात्रै लेखा राख्न आग्रह गर्नुभएको हो ।
पछिल्लो समय नक्कली कम्पनी खडा गरी ठगी गर्नेहरुको संख्या बढिरहेको भन्दै अर्थमन्त्री खतिवडाले, त्यस्ता कम्पनीहरुलाई सुधार गर्नु चुनौतीपूर्ण बनेको बताउनुभएको छ । उहाँले वित्तीय ठगी गर्नैका लागि कतिपय कम्पनीहरु नक्कली नागरिकता र शेयरधनी खडा गरी कम्पनी रजिष्ट्रारमा दर्ता हुने गरेको पाइएको उल्लेख गर्नुभयो ।
‘फ्रड फर्म दर्ता हुने र त्यसको ब्यालेन्स शीट बन्ने गरेको छ । त्यसैको अडिट हुने तर गल्ती कसको हुने भन्नेमा अन्यौलता देखिने गरेको छ । एकाउन्ट हेर्दा सबै ठिकै हुन्छ’, उहाँले भन्नुभयो, ‘अडिटर जानुहुन्छ, मैले जाने बुझेअनुसार सबै बिवरण ठिक छ भन्नुहुन्छ, सही गर्नुहुन्छ । त्यसको फ्रड जरैबाट सुरु हुने गरेको छ ।’
संघ, प्रदेश र स्थानीय तहको अधिकारको जवाफदेहिताका विषयमा अझै अन्यौलता कायमै रहेको उहाँको भनाइ छ ।
विद्यमान अन्यौलताको अन्त्यका लागि कतिपय कानुन बनिसकेको तथा केही बन्ने क्रममा संसदमा रहेको उहाँले बताउनुभयो । कानुन निर्माणपछि संघीयतासँग जोडिएका अन्यौलतासँगै व्यावसायिक क्षेत्रका सम्पूर्ण पक्षलाई व्यवस्थित गर्नेगरी काम भइरहेको उहाँको भनाइ छ ।