‘सत्तारुढ दलले संसदलाई दलगत अनिर्णयकाे बन्दी बनाए’

पुष २७, २०७६ आइतबार १४:१२:५८ | उज्यालो सहकर्मी

काठमाण्डौ - प्रतिनिधिसभालाई सत्तारुढ दल नेपाल कम्युनिष्ट पार्टी (नेकपा) ले दलगत अनिर्णयको बन्दी बनाएको भन्दै प्रतिपक्षी दल कांग्रेसले आपत्ति जनाएको छ ।

संसद बैठक सत्तापक्षकै कारण महिना दिनदेखि अवरुद्ध हुनु सरकार र सत्तारुढ दलको संसदप्रतिको गैह्र जिम्मेवार व्यवहार रहेको कांग्रेसले जनाएको छ । नेपाली कांग्रेसका प्रवक्ता विश्वप्रकाश शर्माले जारी गरेको विज्ञप्तिमा संसदको महत्व र गरिमामाथि सत्तारुढ दलबाटै प्रहार भएको उल्लेख छ ।

यौन दुर्व्यवहारकाे आराेप लागेर कृष्णबहादुर महराले सभामुख पदबाट राजिनामा दिएपछि गएको तीनमहिनाबाट प्रतिनिधिसभाको सभामुख पद रिक्त छ । सत्तारुढ दल नेकपाले सभामुख कसलाई बनाउने भन्ने बारे टुंगो लगाउन नसक्दा संसद बैठक निरन्तर स्थगित हुँदै आएको छ ।

गएको ११ गते र १६ गतेको बैठक सूचना टाँस गरेरै स्थगित भएकोमा आइतबारको बैठक पनि सूचना टाँस गरेरै स्थगित भएको छ ।

नयाँ सभामुख चयन गर्न प्रतिनिधिसभामा प्रक्रिया अघि बढाउनु पर्नेमा सत्तारुढ दल आफैँमा विवाद गरेर संसदलाई छायाँमा पार्नु आपत्तिजनक र लज्जास्पद भएको कांग्रेसको ठहर छ ।

प्रतिनिधिसभालाई दलगत अनिर्णयको बन्दी नबनाउन चेतावनी दिँदै निकासको मार्ग प्रसस्त गर्न पनि सत्तारुढ दललाई कांग्रेसले सचेत गराएको छ ।

यस्तै समाजवादी पार्टीका नेता डा.बाबुराम भट्टराईले संसदलाई पंगु बनाउने काम भएको भन्दै आपत्ति जनाउनुभएको छ । एउटै दलको स्पष्ट बहुमत हुँदा पनि गुटगत खिचातानीका कारण संसद निष्काम हुने अवस्था आउनु र जनप्रतिनिधि मुकदर्शक भैरहनु लोकतन्त्र र कम्युनिज्म हुनै नसक्ने उहाँले बताउनुभयो ।

हिजो दलीय खिचातानिले संस/संसद बन्धक बन्दा अन्तरिमकाल र सहमतिको राजनीति भनेर चित्त बुझाइयो । तर आज नियमित संविधान र एउटैदलको स्पष्टवहुमत हुँदा गुटीय खिचातानीका कारण प्रतिनिधिसभा पंगु/निष्काम हुने र बैठक सरिरहने?जनप्रतिनिधि मुकदर्शक भैरहने?यही हो लोकतन्त्र?अझै कम्युनिज्म ? धन्य कणहरू!
— Baburam Bhattarai (@brb1954) January 12, 2020

सामाजिक सञ्जाल ट्वीटरमा लेख्दै डा.भट्टराईले हिजो दलीय खिचातानीले संसद बन्धक बन्दा अन्तरिमकाल र सहमतिको राजनीति भनेर चित्त बुझाइएको सम्झँदै आज नियमित संविधान र एउटै दलको स्पष्ट बहुमत हुँदा पनि संसद बैठक सत्तारुढ दलबाटै स्थगित हुनु उपयुक्त नरहेको बताउनुभयो ।

अन्तिम अपडेट: मंसिर ७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्