दुईदिने राष्ट्रिय युवा सम्मेलन सुरु : पढ्ने वातावरण बनाइदिन सरकारसँग एसिड पीडित खातुनकाे आग्रह

माघ ७, २०७६ मंगलबार १५:४४:१० | उज्यालो सहकर्मी

काठमाण्डौ -‘समानताको पुस्ता, प्रतिबद्ध युवा दस्ता’ भन्ने नाराका साथ सोमबारदेखि २ दिने राष्ट्रिय युवा सम्मेलन ललितपुरमा सुरु भएको छ ।

सम्मेलनमा समाज रुपान्तरणमा युवाहरुको योगदान तथा अपरिहार्यताको बारेमा छलफल हुनुका साथै लैंगिक समानता, महिला सशक्तिकरण र हिंसा न्यूनीकरणको क्षेत्रमा युवा परिचालन गर्ने बारेमा पनि छलफल चलिरहेको छ ।

यसका साथै लैगिक समानताका क्षेत्रमा भएका विभिन्न अन्तर्राष्ट्रिय प्रयासहरुका महत्वपूर्ण उपलब्धिलाई पनि छलफलमा विषय बनाइएको छ ।

सम्मेलनको उद्घाटन गर्दै एसिड पीडित १४ वर्षीय मुस्कान खातुनले महिला भएकै आधारमा कोही पनि कुनै पीडामा पर्ने वातावरण अन्त्य गर्नुपर्नेमा जोड दिनुभयो ।

आफूलाई समाजमा बाहिर निस्कन नदिने अभिलाषाकासाथ अपराधीले एसिड प्रहार गरेको भए पनि उसलाई चुनौती दिन आफू जस्तै एसिड पीडितको पक्षमा आवाज उठाउन देशैभर पुग्ने खातुनले प्रतिबद्धता जनाउनु भयो ।

‘जस्ले एसिड छ्याप्यो उसले मलाई समाजमा बाहिर निस्कन नदिने उदेश्य राखेको थियो, तर उसको उदेश्य पूरा हुन नदिन म आफू जस्तै पीडितका लागि आवाज उठाउछु ।’

खातुनले प्रदेश २ सरकारले चलाई रहेको ‘बेटी बचाउ बेटी पढाउ’ अभियान प्रति लक्षित गर्दै पहिला पढ्न जाने वातावरण बनाउन आग्रह गर्नुभयो । ‘बेटी बचाउ बेटी पढाउ’ भन्ने नारा लिएको छ प्रदेश सरकारले तर पढ्न जाँदा यस्तो हुन्छ कसरी पढ्ने ?,’ उहाँले प्रश्न गर्दै भन्नुभयो, ‘दोषीलाई कडा भन्दा कडा सजाय भए पो हामी निर्धक्कसँग पढ्न सक्छौँ ।’

खातुनले सरकारले आफूजस्तै एसिड पीडितका लागि सरकारले शिक्षा, स्वास्थ्य र रोजगारको ग्यारेण्टी गर्न माग पनि गर्नु भयो ।

कार्यक्रममा प्रतिनिधिसभा सुशासन समितिको सभापति शशी श्रेष्ठ, महिला अधिकारकर्मी वन्दना राणा, दुर्गा घिमिरे, मेधा शर्मा लगायतले महिला अधिकारका क्षेत्रमा धेरै उपलब्धि भए पनि अझै समानता हात पर्न नसकेको बताउनुभयो ।

नेपाल सरकार राष्ट्रिय युवा परिषद्सँगको सहकार्यमा जागृति बाल तथा युवा सरोकार नेपाल र बेइजिङ पुनरावलोकनका लागि राष्ट्रिय सञ्जालले संयुक्त रुपमा सम्मेलन आयोजना गरेको हो ।

दुई दिनसम्म चल्ने सम्मेलनमा ७७ वटै जिल्लाका २ सय जना युवाको सहभागिता रहेको छ ।

सम्मेलन युवाहरुको आह्वान र प्रतिबद्धतासहितको घोषणा पत्र तयार पारेर सरोकारवालालाई हस्तान्तरण गर्दै बुधबार सम्पन्न हुनेछ ।

अन्तिम अपडेट: पुस ३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्