खोटाङ – फरार आरोपितका विषयलाई लिएर प्रहरीले यातना दिएको भन्दै दिक्तेल रुपाकोट मझुवागढी नगरपालिका–९, निर्मलीडाँडाका बुद्धिराज राई र समृत राईले मानव अधिकार आयोगमा प्रहरीविरुद्ध उजुरी दिएका छन् ।

कुटपिट, लुट र जबरजस्ती करणी गरेको आरोपमा निसान राई फरार भएपछि पक्राउ गरेर प्रहरीले यातना दिएको भन्दै बाबु बुद्धिराज र दाजु समृतले आइतबार राष्ट्रिय मानव अधिकार आयोगको उप–क्षेत्रीय कार्यालय दिक्तेलमा उजुरी दिनु भएको हो ।

फरार आरोपित निसानलाई पक्राउ गर्नका लागि प्रहरीले आफूहरुलाई साउन ११ गते राति गाउँबाट पक्राउ गरेर हत्कडी लगाएर सोही राति शारीरिक यातना दिएकाले आयोगमा उजुरी दिएको बुद्धिराजले बताउनुभयो । 

शनिबार जिल्ला प्रहरी कार्यालयमा ल्याइएका राईद्धयलाई तारिखमा छाडेको प्रहरीले जनाएको छ । फरार निसानमाथि साउन १ गते कुटपिट, लुट र करणी गरेको अभियोग छ ।