दाङ - जिल्ला उद्योग वाणिज्य संघले आवश्यक समन्वय बिनै दिउँसो अत्यावश्यक पसलहरु खोल्ने निर्णय गरेपछि घोराही बजार क्षेत्रमा भिडभाड देखिएको छ ।

यस अघि जिल्ला प्रशासनले आईतबार, मंगलबार र शुक्रबार मात्रै बिहान ६ देखि ९ बजे सम्म खाद्यान्न र तरकारी पसल खोल्ने निर्णय गरेको थियो ।
तर दाङ जिल्ला उद्योग वाणिज्य संघले सोमबार विज्ञप्ति निकालेर होम डेलिभरी सेवा बन्द हुने र दिउँसो ११ देखि ३ बजेसम्म अत्यावश्यक पलसहरु खुल्ने निर्णय सार्वजनिक गरेपछि घोराही क्षेत्रमा भिडभाड देखिएको हो ।

सरकारले आउँदो २५ गतेसम्म लकडाउनलाई पूर्ण पालना गराउने र पास विना कुनै पनि गाडी चल्न नदिने जिल्ला प्रशासन कार्यालयहरुलाई परिपत्र गरेको छ । हप्तामा तीन दिन बिहान खुल्दै आएका पसलहरु अब दैनिक दिउँसो ४ घण्टा खोल्ने निर्णय भएपछि त्यसको चर्को आलोचना समेत भएको छ ।

दिउँसो पसलहरु खोल्ने विषयमा आफूहरुलाई कुनै जानकारी नभएको स्थानीय प्रहरी प्रशासनले जनाएको छ । घोराही क्षेत्रमा अहिले बाक्लो मात्रामा प्रहरी परिचालन गरी पसलहरु बन्द गराउने र गाडीहरु नियन्त्रणमा लिने काम भैरहेको छ ।