काठमाण्डाै – आज असार १५, राष्ट्रिय धान दिवस तथा दही चिउरा खाने दिन ।

‘धान उत्पादनमा वृद्धि, आत्मनिर्भरता र समृद्धि’ भन्ने मूल नाराका साथ १७ औँ राष्ट्रिय धान दिवस तथा रोपाइँ महोत्सव गरिँदैछ । आजका दिन असारे भाकामा लोकदोहोरी गाउँदै छुपुछुपु हिलोमा धान रोपिन्छ ।  कामको चटारोले थकित भएका किसान शक्ति प्राप्तिका लागि दही चिउरा खान्छन् ।

आज देशका विभिन्न ठाउँमा नेतादेखि सर्वसाधारणले याे दिवस मनाएका छन् । स्थानीय जनप्रतिनिधिले पनि हिलाेमै टेकेर दिवस मनाएका छन् । 

तनहुँको व्यास नगरपालिका ५ साँगेका महिला रोपाइँ गर्नका लागि ब्याडबाट धानको बिउ निकाल्दै । असार सुरु भएसँगै जिल्लाका कृषकलाई धान रोपाइँको चटारो छ ।

धनगढी उपमहानगरपालिका १३ काे कैलाली गाउँको खेतमा धान रोप्दै स्थानीय कृषक । यहाँका अधिकांश किसानहरु हिजोआज रोपाइँ गर्नमा व्यस्त रहेको पाइन्छ ।

कञ्चनपुरको शुक्लाफाँटा नगरपालिका २ का महिला धान रोप्न बिउ काढ्दै । समयमै वर्षा हुँदा धान रोपाइँ कार्य कञ्चनपुरमा ५३ प्रतिशतभन्दा बढी सकिएको छ ।

नेपाल कम्युनिस्ट पार्टी (नेकपा) का उपाध्यक्ष वामदेव गौतम १७ औँ राष्ट्रिय धान दिवस तथा रोपाइँ महोत्सवकाे अवसरमा सोमबार ललितपुरको भैँसेपाटीम रहेकाे आफ्नो निवास नजिकै खेतमा धान रोप्न हातमा बिउ लिँदै ।

१७ औँ राष्ट्रिय धान दिवसकाे अवसरमा सोमबार तनहुँको म्याग्दे गाउँपालिका २ जामुनेमा धान रोप्दै किसान ।

नेपाल कृषि अनुसन्धान परिषद् बाली विज्ञान महाशाखा खुमलटारमा सोमबार रोपाइँ गरी १७ औँ राष्ट्रिय धान दिवस मनाइयो । फार्म परिसरमा रोपाइँकाे लागि राखिएको धानको बिउ ।

ललितपुरमा रोपाइँकाे लागि ट्र्याक्टरको सहायताले माटो सम्याउँदै ।

ललितपुरमा कोदालीबाट खेत सम्याउँदै किसान । 

ललितपुरमा मेसिनको सहायताले धान रोपिँदै ।

ललितपुरमा धानको बिउ ओसार्दै किसान ।

१७ औँ राष्ट्रिय धान दिवसका अवसरमा आठ लेनको आधुनिक मेसिनबाट धान रोप्दै कृषि औजार अनुसन्धान केन्द्र पर्साका कर्मचारी । 

तस्बिर : रासस