‘भाडा नबढाऊ तर पूरै सिटमा यात्रु राखेर जहाज उडाउन पाउनुपर्छ’

‘संसारमा कतै नभएको नियम लगाएर वायु सेवा व्यवसाय धरापमा पार्न खोजियो’

भदौ ३१, २०७७ बुधबार १९:२४:० | उज्यालो सहकर्मी

काठमाण्डौ – वायु सेवा सञ्चालकले सिट क्षमताको ५० प्रतिशत मात्रै यात्रु बोक्न पाउने नियम खारेज नभए जहाज नै नउडाउने भएका छन् ।

सरकारले असोज १ गतेदेखि आन्तरिक उडान गर्न पाइने तर सिट क्षमताको ५० प्रतिशत मात्रै यात्रु बोक्न पाउने नियम बनाएको छ । तर वायु सेवा सञ्चालक सङ्घले भने यस्तो नियम संसारमा कतै नभएको भन्दै पूर्ण सिट क्षमतामा यात्रु बोक्न नपाउने भए उडान नै सुरु नगर्ने अडान लिएका छन् ।

पर्यटन मन्त्रालयमा बुधबार भएको छलफलमा पनि वायु सेवा सञ्चालक सङ्घले झण्डै सात महिना बन्द भएका एअरलाइन्स अझै पनि ५० प्रतिशत क्षमतामा यात्रु बोकेर उडाऊ भन्नु अत्यन्तै गैरजिम्मेवार निर्णय भएको बताएका छन् ।

‘सुरुमा २५ प्रतिशतको सङ्ख्यामा मात्रै उडान गर्न भनेकोमा हाम्रो आपत्ति छैन तर सिट क्षमताको ५० प्रतिशत मात्रै उडाऊ भन्नु कत्ति पनि जिम्मेवारपूर्ण निर्णय भएन, संसारका कुनै पनि देशले आधा क्षमतामा जहाज उडाउन भनेका छैनन्, हाम्रो देशमा मात्रै किन यस्तो ?’ वायुसेवा सञ्चालक सङ्घका कोषाध्यक्ष रुपेश जोशीले उज्यालोसँग भन्नुभयो ।

मन्त्रालयले भाडा बढाउने प्रस्ताव राखेकोमा पनि वायु सेवा सञ्चालक सङ्घले उत्साहित नभएको जनाएको छ । ‘अहिलेको अवस्थामा भाडा बढाउने निर्णयको स्वागत गर्दैनौँ, हाम्रो सरोकार भाडा बढाउने होइन पूर्ण क्षमतामा यात्रु बोक्न पाउनुपर्छ भन्ने हो’, जोशीले भन्नुभयो ।

अन्तर्राष्ट्रिय नागरिक उड्डयन सङ्गठन आईकाओ, पर्यटन मन्त्रालय, नागरिक उड्डयन प्राधिकरणलगायतका निकायले तोकेका पूर्ण मापदण्ड पालना गर्दा पनि आधा क्षमतामा यात्रु उडाउन भनेर व्यवसायलाई नै धरापमा पार्ने काम भइरहेको वायु सेवा सञ्चालकको भनाइ छ ।

अन्तिम अपडेट: पुस ४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्