काठमाण्डाै – चन्द्रपुर नगरपालिका रौतहटले राष्ट्रिय महिला लिग फुटबलमा सोमबार पहिलो जित निकालेको छ । 

ललितपुरमा रहेकाे अखिल नेपाल फुटबल सङ्घ (एन्फा) को मुख्यालमा भएको खेलमा चन्द्रपुर नगरपालिकाले चौदण्डीगढी नगरपालिका उदयपुरलाई ७–१ अन्तरले हराएको हो ।  

चन्द्रपुरको जितमा सविता राना मगरले ह्याट्रिक गर्दा रजनी थोकरले दुई, दिलकुमारी राना मगर र सनिता भोलानले एक–एक गोल गरे । चौदण्डीगढीकी अञ्जन थुलुङले एक गोल फर्काइन् ।

ह्याट्रिक पूरा गरेकी सविताले खेलकाे ५१, ६९ र ७८औँ मिनेटमा गोल गरेकी थिइन् । पहिलो हाफ निकै प्रतिस्पर्धामक बनेको थियो । पहिलो हाफमा काउण्टरमा पुगेको चन्द्रपुरले इन्जुरी समयमा मात्र खाता खोलेको थियो । दुई गोल गरेकी दिलकुमारीले पहिलो र दोस्रो हाफको इन्जुरी समयमा गोल गरेकी थिइन् । यस्तै रजनी थोकरले ४७ र सुनिता भोलानले ८५ औँ मिनेटमा गाेल गरेकी थिइन् । यसअघि पहिलो हाफमा चौदण्डीगढीले २३ औँ मिनेटमा सुरुवाती अग्रता लिएकाे थियो ।

प्रतियोगितामा मङ्गलबार विभागीय टोली नेपाल पुलिस क्लब र वालिङ नगरपालिकाबीच दिनको पहिलो खेल हुँदा दोस्रो खेल त्रिभुवन आर्मी क्लब र एपीएफ क्लबबीच हुनेछ ।