काठमाडौं – प्रतिनिधिसभा शिक्षा तथा स्वास्थ्य समितिको ‘राष्ट्रिय चिकित्सा शिक्षा विधेयक, २०७५’ माथिको दफावार छलफलमा वरिष्ठ चिकित्सक गोविन्द केसी पनि सहभागी हुनु भएको छ । 

बुधबार समितिको राष्ट्रिय चिकित्सा शिक्षा विधेयक, २०७५ माथिको दफावार छलफलमा वरिष्ठ चिकित्सक केसी पनि सहभागी हुनु भएको हो । तर, उहाँले त्यो विधेयकमाथिको छलफलमा भने भाग लिनु भएन । विधेयकका बारेमा आफूले सरकारसँग सम्झौंता गरिसकेकाले समितिको बैठकमा छलफलमा भाग लिन नसकिने अडान लिँदै उहाँले बैठकमा त्यससम्बन्धमा लिखित  धारणा राख्नुभयो ।

समितिको बैठकमा वरिष्ठ चिकित्सक केसीले लिखित धारणा राख्दै आफूसँग भएको सम्झौता बमोजिम संसदबाट यथाशीघ्र त्यो विधेयक पारित गराउन पहल गरिदिन समिति समक्ष आग्रह गर्नुभयो । उहाँले प्रधानमन्त्री केपी ओलीले आश्वासन दिएकाले सो विधेयक आफूसँग भएको नौं बुँदे सहमति अनुसार परिमार्जन गरी पारित हुने विश्वास पनि समिति समक्ष व्यक्त गर्नुभयो ।

वरिष्ठ चिकित्सक केसीले मेडिकल शिक्षाको नियमन तथा यसबारे कानुन र नीति निर्माणको काम अन्तर्राष्ट्रिय मापदण्ड अनुसार गर्न पनि संघीय सरकार र सांसदहरुको गम्भीर ध्यानाकर्षण गराउनुभयो । उहाँले नागरिकको स्वास्थ्य सेवामा सहज पहुँच र सबै विद्यार्थीले मेडिकल शिक्षा हासिल गर्न सकून भन्ने उद्देश्यका साथ आफूले १५ औं पटकसम्म सत्याग्रह गर्नु परेको पनि स्पष्ट पार्नु भयो ।

समितिको अर्को बैठक बिहीबार बिहान ११ बजेका लागि बोलाइएको छ । समितिको त्यो बैठकमा राष्ट्रिय चिकित्सा शिक्षा विधेयक, २०७५ का सम्बन्धमा नेपाल मेडिकल एशोसिएशनसँग छलफल गर्ने कार्यसूची तय गरिएको समितिका जेष्ठ सदस्य मानबहादुर विश्वकर्माले जानकारी दिनुभयो ।