ऊर्जा, जलस्रोत तथा सिँचाईमन्त्री वर्षमान पुनले नेपालको जलविद्युतमा लगानी गर्न बंगलादेशका उद्योगी, व्यवसायीहरुलाई आह्वान गर्नु भएको छ । 

मन्त्री पुनले बंगलादेशको राजधानी ढाकामा बिहिबारबाट सुरु भएको ‘इनर्जी एन्ड पावर वीक’ समारोहलाई सम्बोधन गर्दै नेपालको जलविद्युत क्षेत्रमा लगानी गर्न बंगलादेशका उद्योगी, व्यवसायीहरुलाई आह्वान गर्नु भएको हो । त्यस अवसरमा उहाँले बंगलादेशले चाहेमा नेपालको जलविद्युतमा कुनै पनि मोडलमा लगानी गर्न दिन नेपाल सरकार तयार रहेको पनि स्पष्ट पार्नुभयो ।

मन्त्री पुनले दुई मुलुकबीच विद्युत खरिदका लागि भारत हुँदै बंगलादेशसम्म विद्युत प्रसारण लाइन जडान गर्ने सहमति पनि गरिएको स्मरण गराउनुभयो ।

मन्त्री पुनले नेपाललाई समृद्ध बनाउन जल सम्पदाको भरपुर उपयोग गर्ने नीतिलाई नेपाल सरकारले उच्च प्राथमिकता दिएको पनि बताउनुभयो ।

उहाँले नेपालको विद्युत व्यापारको सम्भावनालाई हेरेर बिमस्टेक सदस्य राष्ट्रहरुबीच पनि विद्युत प्रसारण लाइन  जडान गर्ने सहमति गरिएको पनि उल्लेख गर्नु भयो ।

बंगलादेशका प्रधानमन्त्री शेख हसिनाले उद्घाटन गर्नुभएको सो मेलामा बंगलादेशका विभिन्न स्वतन्त्र उर्जा उत्पादकहरुको पनि प्रदर्शनी गरिएको छ ।