काठमाडौं – नेपाल विद्युत प्राधिकरणले आफूले प्रवाह गर्ने सेवामा सुधार ल्याउने र विद्युत चुहावट नियन्त्रणलाई मुख्य प्राथमिकतामा राखी ग्राहकसँग प्रत्यक्ष सम्पर्क राख्ने वितरण तथा ग्राहक केन्द्रका प्रमुखसँग कार्यसम्पादन सम्झौता गरेको छ । 

ऊर्जा, जलस्रोत तथा सिंचाइ मन्त्री वर्षमान पुन, सचिव एवं प्राधिकरण संचालक समितिका अध्यक्ष अनुपकुमार उपाध्याय र संचालक भक्तबहादुर पुनको उपस्थितिमा नेपालगंज क्षेत्रीय कार्यालय अन्तर्गतका वितरण केन्द्रका प्रमुखसँग सोमबार नेपालगञ्जमा कार्यसम्पादन सम्झौता गरिएको हो ।

प्राधिकरणका कार्यकारी निर्देशक कुलमान घिसिङले क्षेत्रीय कार्यालय प्रमुख मनोज कुमार सिंहसँग र वितरण तथा ग्राहक सेवा निर्देशनालयका उपकार्यकारी निर्देशक हरराज न्यौपानेले १६ वितरण केन्द्र प्रमुखसँग सम्झौता गरेका छन् ।

प्राधिकरणले गएको आर्थिक वर्षमा परीक्षणका रुपमा  विराटनगर क्षेत्रीय कार्यालय अन्तर्गतका वितरण केन्द्र प्रमुखसँग सम्झौता गरेको थियो । त्यसबाट चुहावट नियन्त्रण, सेवा सुधार र राजश्व असुलीमा राम्रो नतिजा देखिएपछि चालु आर्थिक वर्षमा देशैभरका ८ क्षेत्रीय कार्यालय अन्तर्गतका वितरण केन्द्र प्रमुखसँग सम्झौता गर्ने प्राधिकरणको योजना छ । 

कार्यक्रममा ऊर्जा मन्त्री पुनले सुशासनको जगमा मात्र विकास र आर्थिक समृद्धि हासिल हुने उल्लेख गर्दै उपभोक्तालाई गुणस्तरीय सेवा दिन कार्यशैलीमा परिवर्तन गर्न र लामो समयदेखि अलपत्र रहेका ग्रामिण विद्युतीकरणका योजनालाई तत्काल सम्पन्न गर्न शाखा  प्रमुखलाई निर्देशन दिनुभयो । 

‘लोडसेडिङ अन्त्य भएको छ तर हामीले प्रवाह गर्ने विद्युत सेवा विश्वसनीय हुन सकिरहेको छैन, अहिले रहेको संरचनाबाटै विश्वसनीय सेवा कत्तिको सम्भव छ ? भन्ने गम्भीर प्रश्न खडा भएको छ’ उहाँले भन्नुभयो ‘हाम्रा आफ्नै काम गर्ने गलत तरिकाका कारण वर्षोंदेखि ठेक्का लगाएका काम सम्पन्न गर्न नसकी ठेकेदारले खेल्ने मौका पाइरहेका छन्, यस्तो गलत प्रवृतिलाई चिरेर योजनाबद्ध रुपमा अगाडि बढ्नु पर्छ र ठेक्का लगाइएका आयोजनाको काम तत्काल सम्पन्न गर्नुपर्छ ।’ 

गएका दिनमा लोडसेडिङको तालिका प्रकाशन गर्ने निकायको रुपमा मात्रै सीमित बनेको प्राधिकरण अहिले खुद नाफा कामाउने संस्थान बन्न सफल भएको बताउँदै मन्त्री पुनले  र जायज काममा जुनसुकै निकायबाट आउने अवरोधको प्रतिवाद आपूmले गर्ने प्रतिबद्धता जनाउनुभयो । 

ऊर्जा सचिव तथा संचालक समिति अध्यक्ष उपाध्यायले कसैको डर, धाक धम्कीबाट नडराउन, ग्राहकलाई दुःख नदिन, गुणस्तरीय विद्युत सेवा आपूर्तिका लागि क्रियाशील रहन, संस्थालाई घाटा हुने काम नगर्न कर्मचारीलाई निर्देशन दिनुभयो । 

कार्यकारी निर्देशक घिसिङले विद्युत चुहावट नियन्त्रण र राजश्व संकलनबाटै प्राधिकरण नाफामा गएको उल्लेख गर्दै त्यसमा ध्यान नदिइएमा संस्था फेरि वित्तीय रुपमा घाटामा जाने बताउनुभयो । ‘ग्राहकलाई मिटर दिंदा घुस माग्ने, आर्थिक चलखेल गर्नेलगायतका धेरै गुनासो आउने गरेका छन्, त्यस्ता काममा संलग्न कर्मचारीलाई अख्तियार दुरुपयोग अनुसन्धान आयोगले समेत समातिरहेको छ ।’

चेतावनी दिँदै उहाँले भन्नुभयो ‘त्यस्ता क्रियाकलापमा संलग्न जुन शाखाको कर्मचारी पक्राउ पर्छ, त्यहाँको शाखा प्रमुखलाई जिम्मेवार बनाई कारवाहीको दायरमा ल्याइन्छ ।’ उहाँले दूरसंचार सेवा प्रदायक कम्पनीहरुले प्राधिकरणको पूर्वाधार प्रयोग गरेवापत तिर्नु पर्ने भाडा रकमलाई त्यस्ता कम्पनीबाट कडाईकासाथ असुल गर्न निर्देशन दिनुभयो । उहाँले नेपालगंज क्षेत्रमा रहेको विद्युत आपूर्तिकाको समस्या छिट्टै समाधान हुने जानकारीसमेत दिनुभएको थियो । 

कार्यसम्पादन सम्झौता मार्गनिर्देशक निर्देशिका भएकाले ग्राहकलाई दिने सेवामा सुधार र कार्यालयभित्रको कार्यसम्पादनमा चुस्तता आई समग्र रुपम संस्थाको प्रशासनिक तथा वित्तीय अवस्थामा सकारात्मक प्रभाव पर्ने प्राधिकरणको अपेक्षा छ । कार्यकारी निर्देशक घिसिङलेसमेत ऊर्जा मन्त्रालयसँग कार्यसम्पादन सम्झौता गर्नुभएको छ । 

वितरण केन्द्र प्रमुखसँगको सम्झौतामा विद्युत चुहावट घटाउने, प्रशासनिक खर्च घटाउने, बाँकी वक्यौता असुल गर्ने, स्तरीय, भरपर्दो तथा सुरक्षित विद्युत सेवा प्रदान गर्ने, ग्राहक सेवाको स्तरवृद्धि गर्नेलगायतका कार्यसम्पादन सुचाकांक निर्धारण गरिएको छ । हरेक क्षेत्रीय कार्यालय र त्यस मातहतका वितरण केन्द्रलाई चुहावट नियन्त्रण, औसत महसुल संकलनको अवधि घटाउने विषयलाई मुख्य लक्ष्य निर्धारण गरिएको छ । कार्य सम्पादनको हरेक चार÷चार महिनामा मूल्याङकन गरिने प्राधिकरणले जनाएको छ ।

हरेक वितरण केन्द्रलाई चुहावट नियन्त्रण र बक्यौता असुलीमा दिइएको लक्ष्यको कम्तीमा ५० प्रतिशत प्रगति हासिल गरेमा प्रमुखलाई निश्चित रकम नगद प्रोत्साहन भत्ता स्वरुप उपलब्ध गराउने व्यवस्था गरिएको छ । यस्तै लक्ष्य हासिल गर्नेले पाएको नम्बर बढुवामा जोड्ने, विदेशमा आयोजना तालिम, सेमिनारमा जान प्राथमिकता दिनेलगायतका गैर नगद प्रोत्साहन समेत पाउने छन् । 

तर ५० प्रतिशतभन्दा कम लक्ष्य हासिल गरेमा त्यसलाई कमजोर कार्यसम्पादन मानी बढुवामा त्यही अनुसार बढुवाका लागि नम्बर दिने र नगद तथा गैर नगद प्रोत्साहन नपाउनेलगायतको व्यवस्था गरिएको छ । प्राधिकरणले प्रमुखहरुलाई  वितरण टान्सफर्मर, मिटर, केवल, पोललगायतका उपकरण समयमै उपलब्ध गराउने र कानुनी परिधिभित्र रहेर स्वतन्त्रपूर्वक काम गर्न दिने प्रतिवद्धता जनाएको छ ।

सम्झौताको अनुगमन र मूल्याङकनका लागि प्रभावकारी प्रणाली बनाइने प्राधिकरणले बताएको छ । विद्युतीय सुरक्षा, आफ्नो कार्यालय अन्तर्गत ग्रामिण विद्युतीकरण, गुणस्तरीय र भरपर्दो विद्युत आपूर्तिलगायतका विषयलाई सम्झौतामा समेटिएको छ ।

गएको असारसम्म प्राधिकरणको प्रणालीमा औसत २०.४५ प्रतिशत विद्युत चुहावट छ । प्राधिकरणले धेरै विद्युत चुहावट भएकालाई धेरै र कम चुहावट भएकालाई कमको चुहावट नियन्त्रणको लक्ष्य दिएको छ । यस्तो लक्ष्य औसतमा ४ प्रतिशत रहेको प्राधिकरणले जनाएको छ । नेपालगञ्ज र क्षेत्रीय कार्यालय अन्तर्गत असारसम्मको चुहावट १६.६५ प्रतिशत छ । चालु आवको दुई महिनामा चुहावट ११.९८ प्रतिशत छ । चालु आवमा विद्युत चुहावटलाई घटाएर औसतमा ११.६५ प्रतिशत कायम गर्ने लक्ष्य निर्धारण गरिएको छ ।