यो कस्तो पार्किङ शुल्क : पाँच मिनेट गुडेको सवारीबाट ४० रुपैयाँ असुलियो

असोज २६, २०७५ शुक्रबार १७:४६:५१ | शिव ढुंगाना

ओखलढुंगा – पहाडी जिल्लाबाट राजधानी र तराई जाने सवारीमा कटारी नगरपालिकाले राजमार्गमा गुडेकै अवस्थामा पार्किङ शुल्क लिँदै आएको छ ।

नगरपालिकाले ठेक्का नै लगाएर सिद्धिचरण राजमार्ग र मध्य पहाडी राजमार्ग हुँदै पहाडका तीन जिल्ला आउने सवारीमाथि मनपरि कर उठाएको हो ।
पहाडका तीन जिल्ला ओखलढुंगा, खोटाङ र सोलुखुम्बु आवत–जावत गर्ने सवारीमाथि उदयपुरको घुर्मीमा सडकबाट रोकेर पटकैपिच्छे पार्किङ शुल्क उठाउने गरेको हो । ओखलढुंगाबाट काठमाडौंलगायत तराईका अन्य जिल्ला जान मध्यपहाडी राजमार्गको घुर्मी खण्डमा झण्डै तीन किलोमिटर सडक पर्छ । बाँकी ओखलढुंगा र सिन्धुलीको भाग पर्छ । तर नगरपालिकाले राजमार्गमा नरोकिने सवारीलाई पार्किङ शुल्क भन्दै रकम असुलिरहेको छ ।

अझ कर असुल्न तोकिएका व्यक्तिले सवारी पिच्छे फरक–फरक रकम लिने गरेका छन् । रकम लिएपछि नगरपालिकाको रसिद दिने भए पनि रसिदपिच्छे फरक–फरक रकम उल्लेख गरिएको छ ।

टाटा सूमोलाई ३५ देखि ४५ रुपैयाँसम्म असुलिएको पाइएको छ । यसरी हरेक दिन काठमाडौंबाट पाहाडी जिल्ला आएका सवारीले शुल्क तिर्दै आएका छन् । असोज २५ गते ४९६९ नम्बरको सुमोले काठमाडौंबाट ओखलढुंगा आउँदा घुर्मीमा पार्किङ शुल्क ४५ रुपैयाँ दियो, तर बील ४० रुपैयाँको मात्रै दिइएको छ ।

त्यस्तै भदौ २५ गते ओखलढुंगा आएको निजी सवारीले ३५ रुपैयाँमा १३ प्रतिशत कर थपेर तिरेको छ । यसरी कटारी नगरपालिकाले मनपरि दरमा गुडेका गाडीबाट पार्किङ शुल्क उठाइरहेको छ । यो कर नगरपालिका आफैले जारी गरेको आर्थिक ऐन विपरित छ । ०७५ असार २४ गतेको नगरसभाबाट पारित कटारी नगरपालिकाको आर्थिक ऐनको दफा ७ मा सवारी कर सम्बन्धी व्यवस्था गरेको छ । उक्त ऐनमा नगरपालिका क्षेत्रभित्र दर्ता भएका सवारी साधनमा सवारी कर लगाइने उल्लेख छ ।

तर, पहाडका तीन जिल्ला ओखलढुंगा, खोटाङ र सोलुखुम्बु हुँदै काठमाडौं र तराइका जिल्ला जाने अधिकांश सवारी सम्बन्धित जिल्ला र केही काठमाडौं र सिन्धुलीमा दर्ता छन् । ऐनमा नगरक्षेत्रभित्र दर्ता भएका सवारीमा कर लिने भनिए पनि देशभर चल्ने सबै सवारीमा मनपरि असुल्न थालेपछि व्यवसायी आक्रोशित बनेका छन् । उदयपुरको कटारी नगरपालिका वडा नं. १४ मा जम्मा सवारी पाँचदेखि ७ मिनेट मात्रै गुड्छन् ।

निजी यातायात तथा सवारी कटारी नगरपालिकाको गैर कानुनी करको मारमा परेको उद्योग वाणिज्य संघ, ओखलढुंगाका सचिव निबन्ध श्रेष्ठले बताउनुभयो । ‘राजमार्गमा गुड्दा किन पार्किङ शुल्क लिने ?, कटारीको भूभागमा १० मिनेट पनि सवारी गुड्दैनन्’, श्रेष्ठले भन्नुभयो ।

सडकमा गुडेका सवारीमाथि पार्किङ शुल्क लिएको विषयमा कटारी नगरपालिकाका सूचना अधिकारी ओमबहादुर मिश्रले नगरपालिकाले ‘पार्किङ जोन’ तोकर त्यस क्षेत्रमा रोकिएका सवारीलाई मात्र कर लिएको बताउनुभयो ।
‘घुर्मी बजार जोनमा परेकाले रोकिएका सवारीमा मात्रै कर लिइएको हो, अन्य सवारीमा छैन’ मिश्रले भन्नुभयो, ‘होटल छेउमा रोकिएका सवारी पार्किङ हुन, कि होइनन् ?’

अन्तिम अपडेट: मंसिर ७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

शिव ढुंगाना

शिव ढुंगाना ओखलढुंगाका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्