काठमाण्डौ – रमजानको समयमा यूएईमा भीख माग्ने र अनधिकृत रूपमा चन्दा सङ्कलन गरेमा कडा कारबाही हुने भएको छ ।

स्थानीयवासीहरू रमजानको पवित्र समयमा उदार हुने भन्दै यसको फाइदा उठाएर कसैले कुनै पनि बहानामा भीख माग्ने र चन्दा सङ्कलन गरेकाे पाइएमा जरिवाना र जेल सजाय हुने खबर गल्फ न्युजले लेखेको छ ।

यूएईमा यो समयमा भीख माग्न र कुनै पनि कामको बहानामा चन्दा सङ्कलन गर्न प्रतिबन्ध लगाएको छ । 

यूएईको पेनल कोडले यो सजाय व्यक्तिगत र संस्थागत रुममा भीख माग्ने र चन्दा उठाउने सबैलाई समेट्ने जनाइएको छ । रमजान महिना सुरु भएयता गएको  मार्च महिनामा ६७ जना भीख मागिरहेका व्यक्तिहरूलाई दुबई प्रहरीले पक्राउ गरिसकेको जनाएको छ । पक्राउ पर्नेमा ३१ जना पुरुष र ३६ जना महिला रहेका छन् ।

भीख माग्ने र चन्दा सङ्कलन कार्यले सामाजिक सुरक्षामा असर पर्ने र देशका प्रतिष्ठामाथि समेत आँच आउने भन्दै यूएईले यस्ताे कार्यलाई अपराधको रूपमा लिएको छ ।

साथै यस्तो कार्यले गैरकानुनी आर्जन हुने, चोरी बढ्ने र बालबालिकामाथि अत्याचार बढ्ने यूएईको ठहर छ । 

व्यक्तिगत रूपमा कसैले भिख मागेको पाइएमा पाँच हजार दिर्हामभन्दा कम हुने गरी जरिवाना र तीन महिना महिना जेल सजाय हुने छ भने संस्थागत रूपमा भीख मागेकाे पाइएमा एक लाख दिर्हाम जरिवाना र ६ महिना जेल सजाय हुन सक्नेछ ।

यस्तै अनुमति पत्र बिना अनधिकृत रूपमा चन्दा सङ्कलन गरेको पाइएमा जेल सजाय वा पाँच लाख यूएई दिर्हामसम्म जरिबाना हुनेछ ।