डोटी – डोटीका तीन जना किसान भीमदत्त उत्कृष्ट पुरस्कारबाट पुरस्कृत भएका छन् ।

सुदूरपश्चिम प्रदेश कृषि निर्देशनालय दिपायल, राजपुर डोटीले जिल्लाको जोरायल गाउँपालिका–३ की आकृति कठायत जोशी, केआईसिंह गाउँपालिका–६ का हरीलाल जैसी र शिखर नगरपालिका–११ का कर्णबहादुर बलायरलाई उक्त पुरस्बाट पुरस्कृत गरेको हो ।

आर्थिक वर्ष २०७९/८० मा निवेदन दर्ता गर्ने आठ जनामध्ये तीन जना कृषकलाई उत्कृष्ट कृषक छनोट गरिएको निर्देशनालयले जनाएको छ । 

पुरस्कृत भएका किसानहरुलाई जनही २५ हजार नगदसहित प्रमाणपत्र प्रदान गरिएको सुदूरपश्चिम प्रदेश कृषि निर्देशनालय दिपायल, राजपुरका प्रमुख तथा निर्देशक यज्ञराज जोशीले जानकारी दिनुभयो।

किसानको कृषि क्षेत्रमा पछिल्लो समय प्रमुख समस्याको रुपमा जंगली जनावर रहेकाले यसको समाधान गरिनु पर्ने पुरस्कृत हुनु भएका किसान हरिलाल जैशीले बताउनुभयो ।

यसैगरी अर्का किसान कर्णबहादुर बलायरले आफू पुरस्कृत भएकोमा खुसी व्यक्त गर्नु हुँदै अबको आफ्नो लक्ष्य भनेको जिल्लाकै नमूना कृषक बन्ने रहेको जानकारी गराउनुभयो ।

लामो समय रोजगारीको लागि भारतमा बसेका उहाँ हाल बाख्रा पालन पेसामा संलग्न हुनु भएको छ । पुरस्कृत हुनु भएका किसानहरुले जिल्लाका अन्य कृषकलाई पनि बाँझो जमिनलाई खेती योग्य बनाउन आग्रह गर्नु भएको छ ।

कार्यक्रममा बोल्दै जिल्ला समन्वय समिति डोटीका प्रमुख लक्ष्मणबहादुर सिंहले अब गाउँगाउँमा कृषि क्रान्ति गर्न आवश्यक देखिएको बताउनुभयो ।

बाँझो जमिनमा खेती गर्न किसानलाई उत्प्रेरित गर्दै सरकारले आवश्यक नीति ल्याउनुपर्ने उहाँको धारणा छ ।

किसानलाई अनुदानको व्यवस्थासहित कृषि क्षेत्रलाई बढवा दिँदा शिक्षा, स्वास्थ्यमा पनि स्वतः सुधार हुने प्रदेश कृषि निर्देशक जोशीले बताउनुभयो ।

उहाँले भन्नुभयो, ‘किसानलाई अनुदान सहितको व्यवस्था गर्दा धेरै कुरामा फाइदा पुग्ने देखिन्छ, किसानलाई अगाडि बढाउन निर्देशनालय तयार छ ।’