काठमाण्डौ – युरोपेली संघ ईयूको कालोसूचीबाट नेपाल नहटेको विषयलाई लिएर नागरिक उड्डयन प्राधिकरण र वायु सेवा निगमबीच आरोपप्रत्यारोप भएको छ । प्राधिकरणले वायु सेवा निगमको कमजोरीलाई मुख्य कारण मान्दै निगमका कार्यकारी अध्यक्ष युवराज अधिकारीसँग स्पष्टीकरण सोधेको छ ।

त्यसलगत्तै निगमले सार्वजनिकरूपमै प्रतिवाद गर्दै प्राधिकरणकै नियामकीय क्षमतामाथि प्रश्न उठाएको छ । निगमको कमजोरीका कारण ईयूले कालोसूचीबाट नहटाएको भन्ने प्रचार भ्रमपूर्ण रहेको भन्दै निगम व्यवस्थापनले प्रस्टीकरण दिएको छ ।

ईयूले अघिल्लो हप्ता प्राधिकरणका महानिर्देशकलाई सम्बोधन गरी पठाएको पत्रमा नेपाललाई कालोसूचीबाट नहटाउनुको कारण प्राधिकरणकै न्यूनतम अन्तर्राष्ट्रिय सुरक्षाका मापदण्डहरू लागू गर्ने क्षमतामा विश्वस्त हुन नसकिएको स्पष्टसँग उल्लेख गरेको निगमले जनाएको छ ।