मनकारी बालबालिका : देउसी–भैलो खेलेर जम्मा गरेको पैसा द्वन्द्व पीडित बालबालिकालाई

कात्तिक २५, २०७५ आइतबार १७:३१:८ | श्यामशितल परियार

लमजुङ – लमजुङका बालबालिकाले देउसी–भैलो खेली संकलन भएको पैसा द्वन्द्व पीडित बालबालिकालाई प्रदान गरेका छन् ।

बेसीशहर नगरपालिका–२, भकुण्डे ज्यामिरेका बालबालिकाहरुले तिहारमा देउसी–भैलो खेली संकलन भएको रकम बेसीशहरमै रहेको आदर्श महिला तथा बाल विकास केन्द्रमा रहेका द्वन्द्व पीडित बालबालिकाहरुलाई प्रदान गरेका हुन् ।

तिहारमा देउसी–भैलो खेलेर जम्मा भएको १९ हजार १ सय ८० रुपैयाँ बाल विकास केन्द्रलाई प्रदान गरिएको देउसी–भैलो समूहका युजन धितालले बताउनुभयो । उहाँका अनुसार १२ जना बालबालिकाको एक समूहले भैलो खेलेको हो ।

‘परम्परागत रुपमै देउसी–भैलो खेलेर जम्मा भएको पैसा अन्य प्रयोजनमा खर्च गर्न मन भएन । संकलित पैसा सामाजिक सेवामा खर्च गर्नु उत्तम हो भन्ने लाग्यो । त्यसैले भैलो खेली उठेको पैसा द्वन्द्व पीडित बालबालिकाहरुलाई प्रदान गर्यौँ,’ उहाँले थप्नुभयो ।

संकलित पैसा बालबालिकालाई प्रदान गर्न पाउँदा खुशी मिलेको देउसी–भैलो समूहकी सुजा थापाले बताउनुभयो । उहाँका अनुसार यस समूहले अघिल्लो वर्ष देउसी–भैलो खेली जम्मा भएको १४ हजार ७ सय ३० रुपैयाँ पनि द्वन्द्व पीडित बालबालिकाहरुलाई नै सहयोग गरेको थियो ।

देउसी–भैलो समूहकी करुणा धितालका अनुसार समूहले विगत ४ वर्षदेखी देउसी भैलोबाट संकलन भएको रकम आदर्श महिला तथा बाल विकास केन्द्रलाई सहयोगस्वरुप प्रदान गर्दै आइरहेको छ ।

बालबालिकाहरुले भैलो खेली उठेको पैसा द्वन्द्व पीडित बालबालिकालाई सहयोग गरी एउटा राम्रो सन्देश दिएको भन्दै बेसीशहर नगरपालिका–२, का वडाध्यक्ष गणेश कडेँलले खुशी व्यक्त गर्नुभएको छ ।

अन्तिम अपडेट: पुस २, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

श्यामशितल परियार

श्यामशितल परियार उज्यालोकाे लमजुङ र मनाङ जिल्ला सम्वाददाता हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्