काठमाण्डौ – धनकुटा नगर क्षेत्रमा व्यवसाय दर्ता, नवीकरणसहित व्यवसाय सम्बन्धी सम्पूर्ण काम वडा कार्यालयबाटै गरिने भएको छ । नगरपालिकाले वडालाई अधिकार प्रत्यायोजन गरेर व्यवसायसम्बन्धी सबै काम वडा कार्यालयबाटै हुने व्यवस्था मिलाएको हो । यसअघि व्यवसाय दर्ता, नवीकरण, नामसारी, कारोबार थप, लगत कट्टा, व्यवसाय तथा बहाल कर दाखिलालगायतका लागि नगरपालिका कार्यालयमा नै पुग्नुपर्ने बाध्यता थियो ।

तर, अब व्यवसायसँग सम्बन्धी सम्पूर्ण काम वडाबाटै हुने गरी अधिकार प्रत्यायोजन गरिएको धनकुटा नगरपालिकाका मेयर चिन्तन तामाङले जानकारी दिनुभयो । यसले व्यवसायीलाई केही सहज हुने भएको छ ।

वडाबाटै सेवा शुरु गर्नुअघि १० वटै वडाका कर्मचारीलाई प्रशिक्षण समेत दिइएको छ । धनकुटा नगरपालिकाका राजश्व अधिकृत राजु गुरागाईँका अनुसार नगरमा झण्डै तीन हजार व्यवसाय दर्ता छन् । वार्षिक रुपमा दुई सयको सङ्ख्यामा नयाँ व्यवसाय दर्ता हुने गरेको छ ।