काठमाण्डौ – हङकङको जिल्ला अदालतले सन् २०१९ मा भएको विरोध प्रदर्शनमा सहभागी रहेको अभियोगमा थप १२ जनालाई जेल सजाय तोकेको छ । अदालतले अभिनेता ग्रेगरी वोङलाई ६ वर्षसहित अरु ११ जनालाई जेल सजाय तोकेको बीबीसीले जनाएको छ ।

अभियन्ताहरु भेन्टस लाउ र ओवेन चाउविरुद्ध पनि जेल सजाय तोकिएको छ । जेल सजाय पाउनेमध्ये दुई जना पत्रकारमाथि व्यवस्थापिका बैठकमा अबैध रुपमा प्रवेश गरेको आरोप छ भने अरुलाई आन्दोलनमा सहभागी रहेको आरोप छ ।

आरोपितलाई मुद्दा चलाउन मुख्य भूमी चीन पठाउन मिल्ने व्यवस्था भएको सुपुर्दगी कानुनको विरोधमा हङकङमा सन् २०१९ मा विशाल प्रदर्शन भएको थियो । प्रस्तावित कानुनको विरोधमा स्वतन्त्र हङकङ पक्षधर सांसदहरूको आह्वानमा विरोध प्रदर्शन भएको हो । प्रदर्शन महिनौँसम्म चलेको थियो ।

आन्दोलन तीब्र बनेपछि चीनले सन् २०२० मा हङकङका लागि राष्ट्रिय सुरक्षा कानुन लागू गरेको छ । त्यही अनुसार हङकङका प्रजातन्त्रवादी नेता तथा एप्पल डेली नामक पत्रिकाका संस्थापक जिम्मी लाइलगायतलाई यसअघि नै जेल सजाय भइसकेको छ ।