काठमाण्डौ – उज्यालो रेडियो नेटवर्क तथा उज्यालो अनलाइनको सञ्चालक संस्था कम्यूनिकेसन कर्नरले आज २६ औँ वार्षिकोत्सव मनाउँदैछ । २०५५ साल वैशाख १६ गते स्थापना भएको कम्यूनिकेसन कर्नरले रेडियो तालिम र रेडियो कार्यक्रम सञ्चालन गर्नुका साथै २०५८ सालदेखि रेडियो नेटवर्कबाट बिहानी समाचार पत्रिका कायाकैरन शुरु गरेको थियो ।

संस्थाले २०६३ सालदेखि देशव्यापी स्याटलाईट रेडियो, काठमाण्डौमा उज्यालो एफएम ९० मेगाहर्ज र २०६८ सालदेखि 'उज्यालो अनलाइन डटकम' सञ्चालन गर्दै आएको छ । कम्यूनिकेसन कर्नर स्थापना भएको २६ वर्षसँगै नेपालमा स्वतन्त्र रेडियोको यात्रा पनि तीन दशक पुग्न लागेको छ ।

पछिल्लो समय रेडियोसँगै टेलिभिजन, पत्रपत्रिका र अनलाइनमा सङ्कट देखिन थालेको छ । रेडियो, टेलिभिजन, पत्रपत्रिका र अनलाइनभन्दा न्यू मिडिया र सामाजिक सञ्जाल अगाडि देखिन थालेका छन् । तर नयाँ माध्यमप्रति विश्वसनियताको कमी छ ।

मूलधार भनिने आमसञ्चारका माध्यममा सङ्कट देखिँदा अनि नयाँ र वैकल्पिक माध्यमले विश्वसनियता देखाउन नसक्दा सही र कामलाग्दा सूचना प्रवाहमै समस्या देखिएको सञ्चार क्षेत्रका विज्ञ बताउँछन् ।