विश्वकप फुटबलमा स्पेनले इरानलाई १ शून्यले हराएको छ ।

बुधबार राती रुसको काजान एरिनामा भएको खेलमा स्पेनलाई जिताउन खेलको ५४ औं मिनेटमा डिएगो कोष्टाले गोल गरे । इरानका डिफेण्डर रविन रेजाइनले  क्लियर गर्न लागेको बल गोल हुन पुगेको थियो ।

जसका कारण स्पेनले महत्वपूर्ण तीन अंक जोड्दै अघिल्लो चरणको सम्भावना बलियो बनाएको छ । नतिजापछि स्पेन ४ अंक सहित अंकतालिकाको पहिलो स्थानमा छ भने ४ अंक नै रहेको पोर्चुगल दोश्रो र ३ अंक बनाएको इरान तेश्रो स्थानमा छ । 

खेलको ६२ औं मिनेट इरानी टिम र समर्थकका लागि निराशाजनक क्षण हुन पुग्यो । इरानका सेइद इजाटोलाहीले गोल गरेका थिए । फ्रिकिक बललाई हेडमार्फत गोल गरेपछि खेलाडी र समर्थकले खुशी पनि मनाइसकेका थिए तर भिडियो असिस्टेन्ट रेफ्रीले त्यसलाई गोलको मान्यता नदिइ अफसाइड दिएपछि इरानी पक्ष निराश बनेको थियो भने स्पेनी पक्ष खुशी । 

केही अवसरहरुमा इरानका खेलाडी चुकेका थिए । पहिलो गोल हुनुभन्दा अघि भने इरानले निक्कै सुस्त फुटबल खेलेको थियो । उसका सबै खेलाडी रक्षापंक्तिमा बार लागेका थिए भने कुनै आक्रमण बुन्न जाँगर देखाइरहेका थिएनन् । 
 
समूहमा लगातार दुई पराजय ब्यहोरेको मोरक्को प्रतियोगिताबाट बाहिरिएको छ । समूहको अन्तिम खेलमा स्पेनले मोेरक्कोसँग प्रतिस्पर्धा गर्दा इरानले पोर्चुगलको सामना गर्नेछ । त्यही खेलको विजेता समूह बी बाट नकआउट चरणमा प्रवेश गर्नेछन् । 
 
विहीबार रातीको खेलमा गोल गरेसँगै रुस विश्वकपमा ब्राजिलमा जन्मिएका स्पेनिस स्ट्राइकर डिएगो कोष्टाको गोलसंख्या ३ पुगेको छ । यसअघि पोर्चुगलसँग बराबरी हुँदा उनले २ गोल गरेका थिए ।