काठमाण्डौ – विदेशमा समस्यामा परेका नेपालीको स्वदेश फिर्तीका लागि निर्धारण गरिएको उडान तालिका परिवर्तन र रद्द हुन थालेका छन् । बहराइनबाट नेपालीको स्वदेश फिर्तीका लागि हुने पहिलो उडान तालिका सारिएको छ । सरकारले पहिलो उडान असार ३ गते हुने भनिए पनि प्राविधिक कारणले असार ७ गते मात्रै हुने त्यहाँ रहको नेपाली दूतावासले जनाएको छ ।

साउदी र माल्दिभ्सबाट नेपालीको उद्धारका लागि तय भएको पहिलो उडान त शनिबार नै रद्द भएका छन् । असार १ गते हिमालय एअरले साउदीको दमामबाट त्यहाँ समस्यामा परेका नेपालीको स्वदेश फिर्तीका लागि तय भएको चार्टर्ड उडान रद्द भएको साउदीमा रहेको नेपाली दूतावासले जनाएको छ । पहिलो उडान नै अर्को सूचना जारी नहुँदासम्मका लागि स्थगित भएको हो ।

उडान स्थगित भएपछि स्वदेश फर्कने प्राथमिकतामा परेकालाई कोरोना परीक्षण पनि नगर्न दूतावासले अनुरोध गरेको छ । उडान किन रद्द भयो भने खुलाइएको छैन ।

यस्तै असार १ गते नै माल्दिभ्सबाट त्यहाँ समस्यामा परेका नेपालीको स्वदेश फिर्तीका लागि हुने निश्चित भएको उडान पनि रद्द भएको छ ।

साउदी र माल्दिभ्सबाट अर्को उडान कहिले हुन्छ भनेर निश्चित भइसकेको छैन । तर पछि सारिएको बहराइनबाट हुने उडानका लागि भने दूतावासले कोरोना जाँच गराउन अनुरोध गरेको छ ।

नेपाल एअरलाइन्सले बहराइनमा समस्यामा परको नेपालीको स्वदेश फिर्तीका लागि उडान भर्नेछ । तर ८५ प्रतिशत यात्रु सङ्ख्या नपुगेमा या अन्य कारणले कुनै समस्या भएमा उडान तालिका परिवर्तन हुन सक्ने जनाइएको छ ।