लमजुङ – जिल्ला अस्पताल लमजुङले पाँच वर्षभन्दा कम उमेरका बालबालिकालाई सबै स्वास्थ्य सेवा निःशुल्क प्रदान गर्ने भएको छ । मानव विकास तथा सामुदायिक सेवा (एचडीसीएस) को सहयोगमा पाँच वर्षभन्दा कम उमेरका बालबालिकालाई अस्पतालमा उपलब्ध सबै स्वास्थ्य सेवा निःशुल्क प्रदान गरिने अस्पतालका प्रशासन प्रमुख हेमन्त श्रेष्ठले जानकारी दिनुभयो ।

यसअन्तर्गत पाँच वर्षभन्दा कम उमेरका बालबालिकालाई अस्पतालमा अन्तरङ्ग सेवा, बहिरङ्ग सेवा, आकस्मिक सेवा, ल्याब सेवा, एक्स–रे लगायतका सबै सेवा निःशुल्क प्रदान गरिने प्रशासन प्रमुख श्रेष्ठले बताउनुभयो । उहाँका अनुसार याे सेवाका लागि सम्बन्धित वडा कार्यालयमा बालबालिकाको जन्मदर्ता गराएको प्रतिलिपि अस्पतालमा पेस गर्नुपर्नेछ ।

अस्पतालमा गएको एक हप्तादेखि याे कार्यक्रम सुरु भइसकेको छ । याे कार्यक्रम तीन वर्ष (२०७८ देखि २०८०) सम्म चल्ने छ ।

यस्तै अस्पतालले जिल्लाका क्रियाशील पत्रकारहरूलाई बहिरङ्ग सेवामा ५० प्रतिशत छुट दिँदै आएको छ । गरिब, विपन्न व्यक्तिका साथै वृद्धवृद्धा, अपाङ्गता भएका व्यक्तिलाई पनि अस्पतालले निःशुल्क स्वास्थ्य सेवा प्रदान गर्दै आएको प्रशासन प्रमुख श्रेष्ठले बताउनुभयो ।

याे अस्पताल मानव विकास तथा सामुदायिक सेवाद्वारा सञ्चालित छ ।