लमजुङ – लमजुङको दोर्दी गाउँपालिका ८ हिले बजारमा बाढीले क्षति पुर्‍याएकाे छ । लगातारको वर्षासँगै दोर्दी खोलामा आएको बाढीले हिले बजारकाे एक सामुदायिक भवनसहित १५ घर र हिमालयन पावर पार्टनर जलविद्युत् आयोजनाको ड्याम साइट नजिकै रहेका तीन घर पनि बगाएको दोर्दी गाउँपालिकाका अध्यक्ष ओमबहादुर गुरुङले बताउनुभयो ।

‘एक सामुदायिक भवनसहित यस क्षेत्रका १८ घरधुरीमा बाढीले क्षति पुर्‍याएकाे छ’, उहाँले भन्नुभयो, ‘वर्षासँगै आएको बाढीले दोर्दी करिडोरमा रहेका विभिन्न जलविद्युत् आयोजनामा पनि क्षति पुर्‍याएकाे जानकारी आएको छ ।’

गाउँपालिकाका अनुसार दोर्दी करिडोरमा हिमालयन पावर पार्टनर, दोर्दी १ जलविद्युत् आयोजना, लिवर्टी इनर्जी कम्पनी लिमिटेड र सुपर दोर्दी जलविद्युत् आयोजना रहेका छन् ।   

हिले बजारका विस्थापितसँगै अन्य ५० घरधुरीका बासिन्दा फलेनी माविको भवनमा बसेका गाउँपालिकाका सूचना अधिकारी धर्म गुरुङले जानकारी दिनुभयो । उहाँका अनुसार हिले बजारकै ४३ घरधुरी बाढीको उच्च जोखिममा रहेका छन् । हिले बजारमा एक सय १४ घरधुरी रहेका छन् ।

गाउँपालिकाले तत्कालका लागि उपलब्ध १७ थान त्रिपाल वडामार्फत त्यस क्षेत्रमा वितरण गरिसकेको सूचना अधिकारी गुरुङले बताउनुभयो ।

विस्थापित र जोखिममा रहेकाहरूका लागि जिल्ला विपद् व्यवस्थापन समिति, आरसीडीसी र नेपाल रेडक्रस सोसाइटी लमजुङ शाखा लगायतका सङ्घ–संस्थाले राहतका सामग्री उपलब्ध गराएको गाउँपालिकाका अध्यक्ष ओमबहादुर गुरुङले बताउनुभयो ।

‘विभिन्न सरकारी तथा गैरसरकारी सङ्घ–संस्थाबाट विस्थापित र जोखिममा रहेका घरधुरीका लागि राहत सामग्री उपलब्ध भएको छ । उपलब्ध सामग्री वितरण गरिनेछ’, उहाँले भन्नुभयो ।