रोल्पा – ठेकेदारको लापर्बाहीका कारण समयमै पक्की पुल नबन्दा रोल्पाको सुनिलस्मृति गाउँपालिका र प्युठानको स्वर्गद्वारी नगरपालिका जोड्ने घोडा खोलामा स्थानीयवासी जोखिम मोलेर खोला तर्न बाध्य भएका छन् ।

रोल्पाको सुलिचौरदेखि प्युठानको किमिचौर, रोल्पाको रून्टीगढी गाउँपालिका हुँदै दाङको घोराही जोड्ने सबैभन्दा छोटो दुरीको यो सडकमा पर्ने घोडेखोलामा बर्सेनि स्थानीयवासीले सास्ती खेप्दै आएका छन् । 

पुल नबन्दा वर्षायाममा यातायातका साधन ठप्प हुने गरेको छ भने घोडागाउँका स्थानीयवासी दैनिक उपभोग्य वस्तु किन्न किमिचौर बजार झर्दा काठको लप्काबाट खोला तर्न बाध्य छन् ।

नाै महिनामा निर्माण सम्पन्न गर्ने सम्झौताअनुसार सडक पूर्वाधार विकास कार्यालय रोल्पाले गएकाे २०७७ पुसमा दुई करोड ५९ लाख २२ हजार रुपैयाँमा पुल निर्माणको जिम्मा जलजला आशु कन्ट्रक्शनले दिएको थियो । तर सम्झौता अवधि सकिन दुई महिनामात्र बाँकी हुँदा पुल निर्माणको काम भने ३० प्रतिशत पनि भएको छैन ।