रामेछाप – मन्थली नगरपालिकाका मेयर रमेशकुमार बस्नेतसहित पाँच जनप्रतिनिधिले नेकपा एमाले छाडेर नेकपा एकीकृत समाजवादी पार्टी रोजेका छन् । 

एकीकृत समाजवादीमा जानेहरूमा मन्थली नगरपालिकाका मेयरसहित वडा नं १२ गेलुका निर्वाचित वडा सदस्यद्वय लीलाबहादुर बुढाथोकी र उमेश कार्की रहेका छन् । त्यसैगरी लिखु तामाकोशी गाउँपालिका ७ की वडा सदस्य भीमलक्ष्मी सार्कीले पनि एमाले छाडेर एकीकृत समाजवादी पार्टी रोज्नुभएको छ । 

नेकपा एमालेका पार्टी अध्यक्ष केपी शर्मा ओलीले पार्टी सञ्चालन गर्न नसकेको र दुई/दुई पटक संसद् विघटन गरेका कारण एकीकृत समाजवादी पार्टी रोजेको मन्थली नगरपालिकाका मेयर रमेशकुमार बस्नेतले जानकारी दिनुभयो । 

त्यसैगरी एमाले छाड्नेमा गोकुलगंगा गाउँपालिका ५ का वडाध्यक्ष बलराम खड्का हुनुहुन्छ । पाँचै जनाले आज मङ्गलवार जिल्ला निर्वाचन कार्यालयमा पुगेर एकीकृत समाजवादीको पक्षमा सनाखत गरी नेकपा एमाले छाडेको जनाएका हुन् ।