जुम्ला - जुम्लाको तातोपानी गाउँपालिकाका अध्यक्ष नवराज न्यौपानेले गाउँपालिकालाई गाडी फिर्ता गर्नुभएको छ । उहाँले कार्यअवधि सकिनै लाग्दा आफूले प्रयोग गरेको गाडी फिर्ता गर्नुभएको हो।

प्रमुख प्रशासकीय अधिकृत मिलन बुढाथापाका अनुसार हिजाे अध्यक्ष न्यौपानेले कार्यालयमा गाडी बुझाउनु भएको र गाडी एक महिना निर्वाचन अधिकृतको कार्यालयमा प्रयोग हुने भएको छ।

न्यौपानेले चुनाव आउनै लागेकाले कार्यालयलाई गाडी बुझाउनु नैतिक दायित्व भएकाे पनि बताउनु भयाे । 'धेरैजसो गाडीहरु चुनावका समयमा राजनीतिक कार्यक्रममा प्रयोग हुने गरेको पाइन्छ । अब कार्यालयलाई फिर्ता गर्दा ठिकै होला भन्ने लागेर गाडी बुझाएकाे हुँ' उहाँले भन्नुभयाे । 

न्यौपाने माओवादी केन्द्रको तर्फबाट २०७४ सालको चुनावमा अध्यक्ष पदमा विजय हुनुभएको थियो ।