लमजुङ – लमजुङबाट सुरु हुने प्रसिद्ध अन्नपूर्ण पदमार्गमा पर्यटकको संख्या बढ्दै गएको छ । 

मौसममा सुधार आउनुका साथै अवरुद्ध सडक खुलेसँगै यस पदमार्गमा आउने पर्यटकको संख्या बढ्दै गएको हो । 

पर्यटकीय सिजनमै बेसीशहर–चामे सडक पहिरोको कारण लामो समयसम्म अवरुद्ध हुँदा पर्यटकको आगमन संख्यामा केही कमी आएको थियो । तर बाटो खुलेसँगै पर्यटकको संख्या बिस्तारै बढ्दै गएको छ ।
 

अहिले अन्नपूर्ण पदमार्गमा आउने पर्यटकको संख्या बढ्दै गएको एक्याप मनाङका प्रमुख बाबुलाल तिरुवाले बताउनुभयो । उहाँका अनुसार अहिले झण्डै १५० देखी २ सयको हाराहारीमा पर्यटक भित्रिएका छन् ।

‘अहिले दैनिक १५० देखि २ सयसम्म पर्यटक भित्रिएका छन् । पर्यटक आगमन संख्या बढ्दै छ,’ उहाँले भन्नुभयो । मनाङमा वर्षैभरी पर्यटक भित्रिने गर्दछन् । सरोकारवालाका अनुसार सेप्टेम्बर, अक्टोबर र नोभेम्बर महिनालाई पर्यटकीय हिसाबले ‘पिक सिजन’ मानिन्छ ।

व्यवसायीहरु उत्साहित   

पर्यटकको आगमन संख्या बढ्दै गएपछि होटल व्यवसायीहरु पनि उत्साहित देखिएका छन् । बाटोको स्थिति बिग्रँदा पर्यटकको संख्यामा कमी आउँदा स्थानीय होटल व्यवसायीहरु निराश देखिन्थे । 

‘बाटोको स्थिति सुध्रिएसँगै पर्यटकको आगमन बढ्दै गएको छ । हामीहरु उत्साहित छौँ,’ चामेमा  मस्र्याङ्दी मण्डेला नामक होटल चलाउँदै आउनुभएका सन्तोष श्रेष्ठले भन्नुभयो । 

साइकलयात्रीको पनि आकर्षण

पछिल्लो समय यस पदमार्गमा साइकल र मोटरसाइकल यात्रीको पनि आकर्षण बढेको स्थानीय सञ्चारकर्मी नेगम परियारले जानकारी दिनुभयो । अन्नपूर्ण पदमार्ग निकै आकर्षक छ । 

माथिल्लो मनाङसम्म सडक बनेको छ । सडक बनेसंगै साईकल यात्री र मोटरसाईकल यात्रीको आकर्षण पनि बढेको छ ।

‘केही पर्यटक पैदल हिँडेरै आउँछन् । केही पर्यटक भने साइकल र मोटरसाइकालमा पनि आउँछन,’ उहाँले भन्नुभयो । 

पैदल यात्राको लागि साहसिक मानिएको अन्नपूर्ण पदमार्गमा पछिल्लो समय नेपालसहित विभिन्न देशका पर्यटकहरु आउने गर्दछन् । 

नेगमका अनुसार विशेषगरी अन्नपूर्ण पदमार्गमा चाइनिज, अष्ट्रेलियन, इजरायल, जापान, जर्मनी, फ्रान्स, बेलायत, अमेरिका लगायतका देशका पर्यटक आउने गर्दछन् । यो पदमार्ग उच्च हिमाली क्षेत्र अन्तर्गत पर्छ । 

लमजुङको बेसीशहरबाट सुरु हुने पर्यटकको यात्रा मनाङको ताल, सदरमुकाम चामे, माथिल्लो मनाङ, याकखर्क, बेसक्याम्प, ५ हजार ४ सय १६ मिटर उचाईको थोरङ्ला भन्ज्याङ पास गरी जोमसोम, म्याग्दीको तातोपानी, म्याग्दी हुँदै पोखरा पुगेर टुङ्गिने गर्दछ । 

पर्यटकहरु अन्नपूर्ण पदमार्गमा एक हप्तादेखि एक महिनासम्म बिताउने गर्दछन् ।