दाङ – लुम्बिनी प्रदेशको स्थायी राजधानी राप्ती उपत्यकाकाे देउखुरीमा मुख्यमन्त्री तथा मन्त्रिपरिषद्को कार्यालयकाे उद्घाटन भएकाे छ । प्रदेश प्रमुख अमिक शेरचनले आज बुधवार मुख्यमन्त्री तथा मन्त्रिपरिषद् कार्यालयको झण्डोत्तोलन गर्नुभएको हो । 

याेसँगै लुम्बिनी प्रदेशको स्थायी राजधानी राप्ती उपत्यका देउखुरीमा आज बुधवारदेखि मुख्यमन्त्री तथा मन्त्रिपरिषद्को कार्यालयले कामकाज थालेको छ । यही मङ्सिर १९ गते बुटवलबाट मुख्यमन्त्री कार्यालय राजधानीमा सारिएको थियो ।  

मुख्यमन्त्री तथा मन्त्रिपरिषद्को कार्यालय उद्घाटनलाई देउखुरीमा उल्लासकाे रूपमा मनाइएकाे छ । गाउँ–गाउँबाट झाँकीसहित मानिसहरू राजधानी हेर्न पुगेका थिए । अब राजधानीले अवसर, विकास, रोजगारी ल्याओस् भन्ने उनीहरूकाे चाहना छ ।

मुख्यमन्त्री कार्यालयको उद्घाटन गर्दैै प्रदेश प्रमुखले राजधानीले विकासमा पछाडि परेको देउखुरीलाई मात्रै नभइ समग्र प्रदेशलाई समृद्ध बनाउन मद्दत गर्ने बताउनुभयो ।

कार्यक्रममा लुम्बिनी प्रदेशका मुख्यमन्त्री कुलप्रसाद केसीले सङ्घीयता कार्यान्वयनमा लुम्बिनी प्रदेशले समग्र देशकै नेतृत्व गरेको बताउनुभयो । राजधानी कार्यान्वयनसँगै प्रदेशको निसान छापमा राजधानीको नाम राप्ती उपत्यका देउखुरी लेखिने उहाँले जानकारी दिनुभयाे ।