दाङ – लुम्बिनी प्रदेशको सभामुखमा नेकपा माओवादी केन्द्रका तुलाराम घर्ती मगर निर्विरोध निर्वाचित हुनुभएको छ । सभामुख पदकाे मनाेनयनकाे समय सीमाभित्र घर्तीकाे मात्रै उम्मेदवारी परेपछि उहाँ निर्विरोध निर्वाचित हुनुभएको प्रदेश सभा सचिवालयले जनाएको छ ।

गएकाे मङ्सिर ४ गतेकाे चुनावमा गठबन्धनबाट उम्मेदवार बन्नुभएका माओवादी केन्द्रका घर्ती पाल्पा २ (ख) बाट लुम्बिनी प्रदेश सभामा निर्वाचित हुनुभएको थियो ।

यस्तै प्रदेशकाे उपसभामुखमा तीन जनाकाे मनाेनयन दर्ता भएको छ । सत्तारूढ दलको गठबन्धनका तर्फबाट उपसभामुखमा राप्रापाकी मेनुका खाँड केसीकाे मनाेनयन दर्ता भएको छ । यस्तै कांग्रेसबाट नवलपरासी निर्वाचन क्षेत्र नम्बर १ (क) बाट निर्वाचित विश्वप्रेम पाठक र नागरिक उन्मुक्ति पार्टीकी निर्मलादेवी चाैधरीकाे मनाेनयन दर्ता भएको छ । सभामुख र उपसभामुखमा भोलि मङ्गलवार मतदान हुने कार्यक्रम तय भएको छ । 

सत्तापक्षीय गठबन्धनमा लुम्बिनी प्रदेशमा मुख्यमन्त्री एमाले, सभामुख माओवादी र उपसभामुख राप्रपाले लिने गरी सहमति भएको थियो । ८७ सदस्यीय प्रदेश सभामा नागरिक उन्मुक्तिबाहेक पनि सत्तापक्षीय गठबन्धनमा ५१ सदस्य छन् ।