कपिलवस्तु – हिन्दुहरुको महान् चाड बडा दर्सैंको सातौं दिन आश्विन कृष्ण सप्तमीका अवसरमा कपिलवस्तुमा पनि परम्परा अनुसार घर घर, शक्तिपीठ र दशैं घरहरुमा फुलपाती भित्र्याइएको छ । 

तिलौराकोटबाट पैदल बोकेर गाजाबाजाका साथ तौलिहवा सागरटोलमा रहेको चन्द्रघण्टा दुर्गाभवानीको मन्दिरमा स्थानीय सर्वसाधारणहरुले खुशीयालीका साथ फूलपाती भित्र्याएका हुन् । 

दसैंका दिनको लागि पूजासामग्रीस्वरुप चन्द्रघण्टा दुर्गा भवानीको मन्दिरमा फुलपाती भित्र्याइएको हो । चन्द्रघण्टा दुर्गा भवानी व्यवस्थापन समितिको संयोजनमा मन्दिर आसपासका सागरटोल, नयँंटोल लगायतका सर्वसाधारणहरु घर–घरबाट जम्मा भई विशेष गाजाबाजाका साथ फूलपाती भित्र्याएको समितिका अध्यक्ष माधव प्रसाद शर्माले बताए । 

यसैगरी जिल्ला सदरमुकाम तौलिहवामा नेपाल प्रहरी, शशस्त्र प्रहरी र नेपाली सेनाको विभिन्न टोलीहरुले समेत आज फूलपाती भित्र्याएका छन् । घटस्थापनाका दिनदेखि नै विधिवत रुपमा दसै सुरु हुने भए पनि दशैं पर्वको विशेष चहलपहल भने फूलपातीका दिनदेखि सुरु भएको छ ।