ताप्लेजुङ – ताप्लेजुङकाे फुङलिङ नगरपालिकाले ताप्लेजुङ बजार क्षेत्रका अनधिकृत संरचना हटाउन डाेजर चलाएकाे छ । नगरपालिकाले ताप्लेजुङ बजारमा पर्ने मेची राजमार्गकाे दायाँ–बायाँका अनधिकृत संरचना हटाउन पटक–पटक सूचना निकालेर आग्रह गरेकाे थियाे । सूचना दिँदा पनि अटेरी गरेपछि नगरपालिकाले आज मङ्गलवार अनधिकृत संरचना आफैँ हटाउन थालेकाे हाे ।

नगरपालिकाका मेयर अमिर मादेनले सडक डिभिजन कार्यालय इलामको समन्वयमा नगरपालिकाले मेची राजमार्गकाे सडकबाट दायाँ–बायाँ साढे सात मिटरभित्र पर्ने संरचना हटाउन थालेकाे बताउनुभयाे । सडक डिभिजन कार्यालयले राजमार्गमा पर्ने अनधिकृत संरचना हटाउन पालिकाकाे सहयाेग मागेकाे थियाे । 

नगरपालिकाले पहिलाे पटक गएकाे पुस २४ गते ३५ दिने सूचना निकालेर बजार क्षेत्रका अनधिकृत संरचना हटाउन आग्रह गर्दै ३५ दिने सूचना निकालेकाे थियाे । त्यसपछि पालिकाले गएकाे फागुन १४ गते दाेस्राे पटक सूचना निकालेर १५ दिनकाे म्याद दिएकाे थियाे । नगरपालिकाले फेरि चैत १ गते अनधिकृत संरचना हटाउन तेस्राे पटक सात दिनकाे समय दिएकाेमा अन्तिम पटक भन्दै गएकाे चैत २६ गते सात दिने सूचना निकालेकाे थियाे । 

तोकिएको समयभित्र संरचना आफैँ हटाउन र नहटाए सडक ऐनको व्यवस्थाअनुसार प्रक्रिया अघि बढ्ने जानकारी गराएकाे नगरपालिकाले अन्तिम पटकको म्याद सिद्धिएपछि आफैँ घर टहरा हटाउन थालेकाे हाे ।