काठमाण्डौ —  न्युजिल्यान्डले पाकिस्तानमा गएर पाँच खेलको टी–२० क्रिकेट शृङ्खला खेल्ने भएको छ । आउँदो अप्रिलमा न्युजिल्यान्डकाे क्रिकेट टोलीले पाकिस्तानमा शृङ्खला खेल्ने पाकिस्तान क्रिकेट बोर्ड (पीसीबी) ले जनाएको छ ।

अप्रिल १८ देखि २१ सम्म रावलपिन्डीमा तीन वटा खेल र अप्रिल २५ र २७ मा लाहोरको गद्दाफी स्टेडियममा थप दुई खेल हुने पीसीबीले जनाएको छ । गएको फेब्रुअरीमा न्युजिल्यान्डको सुरक्षा विश्लेषण टोलीले पाकिस्तानको भ्रमण गरेपछि खेलको तालिका पक्का भएको हो । सन् २०२२ को डिसेम्बरपछि न्युजिल्यान्डको यो तेस्रो पाकिस्तान भ्रमण हो ।

त्यसअघि न्युजिल्यान्ड पाकिस्तान गएर पनि सुरक्षाको कारण देखाएर खेल नै नखेली फर्किएपछि आलोचना भएको थियो । न्युजिल्यान्डकाे टोलीले अप्रिलमा पाकिस्तानसँग शृङ्खला खेल्ने भएपछि इन्डियन प्रिमियर लिग (आईपीएल) मा न्युजिल्यान्डका खेलाडीले केही खेल गुमाउने भएका छन् ।

यो सिजनका लागि ड्यारेल मिचेल, मिचेल सान्टनर, केन विलियम्सन, रचिन रविन्द्र, ट्रेन्ट बोल्ट, ग्लेन फिलिप्स र लकी फोर्गुसन आईपीएलका विभिन्न टोलीमा अनुबन्धित छन् ।