काठमाण्डौ — काठमाण्डौ महानगरपालिकाले रञ्जना लिपि लेख्न र सिक्न ‘नित्या रञ्जना’ युनिकोड सार्वजनिक गरेको छ । नेपाल कला परिषद्मा हिजो काठमाण्डौ महानगरपालिकाकी उपमेयर सुनिता डङ्गोलले लिपि सार्वजनिक गर्नुभयो । रञ्जना लिपि मौलिक र प्राचीन भएर पनि यी अक्षरहरूको प्रयोग, प्रवद्र्धन हुन सकेको थिएन ।

क्यालिजात्रा फाउन्डेशनमा आबद्ध युवाको सक्रियताले लिपि प्रविधिले ग्रहण गर्न सक्ने, कम्प्युटरमा लेख्न र लिपि सिक्न सक्ने स्वरूपमा रूपान्तरण भएको हो । यो लिपि इन्डो आर्यन, मङ्गोल, भोट बर्मन जातिको इतिहास, अस्तित्व र पहिचान जोडिएको छ ।

लिपी सार्वजनिक गर्दै महानगरकी उपमेयर डङ्गोलले मौलिक लिपि विश्वव्यापीकरण भएको बताउनुभयो । सन् २०१९ मा जापानमा भएको लिपि सम्मेलनमा रञ्जना लिपिको प्रस्तुतिकरण भएको थियो । सम्मेलनको अन्त्यमा लिपिलाई सबैले हेर्न सक्ने, देख्न सक्ने र प्रयोग गर्न सक्ने बनाउन प्रतिबद्धता गरिएको थियो ।

काठमाण्डौ महानगरले ठाउँको प्राचीन नाम पुनरुत्थान गर्दैछ । नित्या रञ्जना लिपिले आफूहरूको कामलाई सहयोग पुग्ने महानगरको सम्पदा तथा पर्यटन समितिका संयोजक आशामान सङ्गतले भन्नुभयो । युनिकोड फन्ट निःशुल्क उपलब्ध हुनेछ ।