काठमाण्डौ – गएराति काठमाण्डौसहित देशका धेरै ठाउँमा हावाहुरी र चट्याङसहित पानी परेको छ । केही ठाउँमा असिनापानीसमेत परेको छ । हावाहुरी र असिनापानीले बालीनालीमा क्षति पुगेको छ । मध्यपश्चिमदेखि पूर्वी क्षेत्रसम्मै हावाहुरीको असर देखिएको मौसम पूर्वानुमान महाशाखाले जनाएको छ ।

महाशाखाका अनुसार हिजो नेपालगञ्ज, दाङ र पोखरा आसपासमा विकास भएको न्यूनचापीय प्रणालीले हावाहुरी र चट्याङसहित वर्षा भएको हो । नेपालगञ्ज र दाङ आसपास विकास भएको प्रणाली केही कमजोर देखिएको तर पोखरा आसपासमा विकास भएको प्रणाली केही शक्तिशाली देखिएको मौसमविद मिनकुमार अर्यालले जानकारी दिनुभयो ।

बेलुकीपख पोखरा आसपासबाट शुरु भएको हावाहुरी काठमाण्डौ हुँदै पूर्वसम्म पुगेको थियो । प्रिमनसुनको बेला हावाहुरी र चट्याङसहित वर्षा हुनु स्वभाविक भएको मौसमविदको भनाइ छ ।

आज पनि दिउँसो र बेलुकीपख केही ठाउँमा हावाहुरी र चट्याङसहित वर्षा हुने सम्भावना रहेको मौसमविद अर्यालले बताउनुभयो । गएको १२ घण्टामा सबैभन्दा धेरै वर्षा गोरखाको बारपाकमा भएको छ । त्यहाँ ९१ मिलिमिटर पानी परेको छ ।