काठमाण्डाै – जिल्ला प्रशासन कार्यालय लमजुङले सार्वजनिक पद धारण गरेका व्यक्ति वा पदाधिकारीलाई जाँड–रक्सीलगायत महँगा उपहार वा कोसेली स्वीकार नगर्न आग्रह गरेको छ ।

कार्यालयले एक सूचना निकालेर सार्वजनिक पदाधिकारीसँगको औपचारिक–अनौपचारिक भेटघाटमा संलग्न व्यक्ति तथा निकायहरूले जाँड–रक्सीलगायत महँगा उपहार लिने तथा दिने गरेको गुनासो प्राप्त भएको भन्दै आचारसंहिताको पालना गर्न सबैलाई आग्रह गरेको छ ।

सहायक प्रमुख जिल्ला अधिकारी गोकर्णराज सुयलले निकाल्नुभएको सूचनामा आफू बहाल रहेको पदअनुसार गर्नुपर्ने कुनै पनि कामका लागि उपहार, कोसेली वा कुनै किसिमको लाभ स्वीकार गर्नु भ्रष्टचारजन्य काम भएको उल्लेख छ । आचारसंहिता वा कानुनको उल्लङ्घन गरेको पाइएमा लिने र दिने दुवै व्यक्तिमाथि कारबाही हुने जिल्ला प्रशासन कार्यालय लमजुङले चेतावनी दिएको छ ।