प्रचण्डले हटाएका ज्ञवालीलाई ओलीले फेरि बनाए प्राधिकरणको सीईओ

 साउन ३०, २०७५ बुधबार १६:४३:२१ | मदन पौड्याल
unn.prixa.net

काठमाडौं –राष्ट्रिय पुनर्निर्माण प्राधिकरणको प्रमुख कार्यकारी अधिकृत सीईओमा सरकारले पुनः सुशील ज्ञवालीलाई नै नियुक्त गरेको छ । 

मंगलबार बसेको मन्त्रिपरिषद् बैठकले ज्ञवालीलाई प्राधिकरणको सीईओमा नियुक्त गरेको हो । केपी शर्मा ओली नेतृत्वको अघिल्लो सरकारले २०७२ साल पुस १० गते उहाँलाई सीइओ नियुक्त गरेको थियो । तर पछि पुष्पकमल दाहाल प्रचण्ड नेतृत्वको तत्कालीन माओवादी केन्द्रको सरकारले २०७३ पुस २७ गते ज्ञवालीलाई पदबाट हटाएको थियो । 

अहिले केपी ओली नेतृत्वको सरकारले फेरि ज्ञवालीलाई नै नियुक्त गरेको हो । पुनर्निर्माण प्राधिकरणको सीईओ नियुक्त ज्ञवालीको मुद्दा सर्वोच्च अदालतमा विचाराधीन छ । आफूलाई हटाउने निर्णय कार्यान्वयन नगर्न अन्तरिम आदेश माग गर्दै ज्ञवाली अदालत जानुभएको थियो । सरकारले सीइओमा नियूक्त गरेसँगै उहाँ मुद्धा फिर्ता लिने तयारीमा हुनुहुन्छ । 

भूकम्प प्रभावितलाई राहत दिनेदेखि पुनर्निर्माणको काम गर्ने प्राधिकरणमा अध्यक्षपछि कार्यकारी अधिकृत प्रमुख पद हो । प्राधिकरणको अध्यक्ष प्रधानमन्त्री रहने व्यवस्था छ । ज्ञवाली सिभिल इन्जिनियर हुनुहुन्छ । पाल्पा घर भएका ज्ञवालीसँग स्थानीय निकायमा लामो समय काम गरेको अनुभवसमेत छ ।

अन्तिम अपडेट: भदौ २८, २०७५

मदन पौड्याल

राजनीति, प्रशासन र समसामयिक विषयमा कलम चलाउने मदन पौड्यालको भूकम्पपछिको पुनर्निर्माणमा दख्खल छ। उहाँलाई फेसबुकमा र ट्विटरमा  भेट्न सकिन्छ।

तपाईको प्रतिक्रिया