सर्लाही – सर्लाहीको हरिपुर नगरपालिका १ मा रहेको १० कट्ठा निजी जग्गा जनमत पार्टी नेपालका कार्यकर्ताले कालो झण्डा गाडेर कब्जा गरेका छन् । 

आज बिहीबार दिउँसो जनमत पार्टीका जिल्ला नेता त्रिभुवन सिंहको नेतृत्वमा आएका कार्यकर्ताले बरहथवा नगरपालिका ९ घर भएका निर्मला मैनाली पन्तको नाममा रहेको १० कट्ठा जग्गा कब्जा गरेकाे हो । मैनालीले स्थानीय उमादेवी महतोलाई झुक्याएर १० कट्ठा जग्गा आफ्नो नाममा नामसारी पास गरेकाले जग्गा कब्जा गरेको जनमत पार्टीका जिल्ला नेता सिंहले दाबी गर्नुभयो । महतोको नाममा रहेको १० कट्ठा जग्गा चलनचल्तीको मूल्यमा २०७८ सालमा खरिद गरेको  मैनालीको भनाइ छ ।  

जनमत पार्टीले विना जानकारी आफ्नो नाममा रहेको १० कट्ठा जग्गामा कब्जा गरेर आफूमाथि अन्याय गरेको मैनालीले बताउनुभयो । मैनालीले त्याे जग्गा २०७८ सालदेखि नै भोगचलन गर्दै आएको स्थानीयवासीले बताएका छन् । 

यसबारेमा प्रहरीलाई कुनै दल वा समूहले जग्गा कब्जा गरेको भनेर जानकारी नआएको इलाका प्रहरी कार्यालय बरहथवाका प्रहरी नायब उपरीक्षक मकेन्द्र मिश्रले जानकारी दिनुभयो ।