बर्दिया – जिल्ला खेलकुद विकास समिति बर्दियाको आयोजनामा भएको १४ औँ जिल्लास्तरीय राष्ट्रपति रनिङ शिल्डको उपाधि ठाकुरबाबा नगरपालिकाले जितेको छ । 

गएको शुक्रवारदेखि बर्दियाको सदरमुकाम गुलरियामा सुरु भएको प्रतियोगितामा सबैभन्दा बढी १९ स्वर्ण, ७ रजत र ५ कास्य पदकसहित ठाकुरबाबा नगरपालिकाले उपाधि जितेको हो ।  

त्यसैगरी दोस्रो भएकाे बाँसगढी नगरपालिकाले ११ स्वर्ण, ८ रजत र ९ कास्य पदक प्राप्त गरेको छ । तेस्रोमा गुलरिया नगरपालिकाले ७ स्वर्ण, ८ रजत र १३ कास्य पदक हात पारेको छ भने चौथोमा राजापुर नगरपालिकाले ५ स्वर्ण, ८ रजत र १० कास्य पदक जितेको छ । 

यस्तै प्रतियोगितामा मधुवन नगरपालिकाले ४ स्वर्ण, ५ रजत र ४ कास्य पदक जितेको छ । बारबर्दिया नगरपालिकाले २ स्वर्ण, ८ रजत र ४ कास्य पदक जितेको छ । गेरुवा गाउँपालिकाले २ स्वर्ण, ६ रजत र २ कास्य पदक जितेको छ भने बढैयाताल गाउँपालिका स्वर्णविहीन बन्दा १ रजत र ५ कास्य पदक जितेको छ ।

बर्दियाका ८ वटा पालिकाबाट ५ सय ६० जना खेलाडीले प्रतिस्पर्धा गरेका जिल्ला खेलकुद विकास समिति बर्दियाका अध्यक्ष रबिन्द्र यादवले जानकारी दिनुभयो । प्रतियोगितामा उत्कृष्ट भएका ९० जना खेलाडीलाई लुम्बिनी प्रदेशस्तरीय रनिङ शिल्ड प्रतियोगितामा पठाउन छनाेट गरिएको जिल्ला खेलकुद विकास समिति बर्दियाका प्रमुख भुपेन्द्र पुनले बताउनुभयो । 

१४ औँ जिल्लास्तरीय राष्ट्रपति रनिङ शिल्ड प्रतियोगिताको समापनमा विजयी खेलाडीहरूलाई जिल्ला समन्वय समिति बर्दियाका प्रमुख सुर्यबहादुर विष्टले पदक प्रदान गर्नुभएको थियो । प्रतियोगितामा भलिबल, कबड्डी, एथ्लेटिक्स, कराते, उसु र तेक्वान्दो खेल समावेश गरिएका थिए ।