नेपाली कांग्रेसका सहमहामन्त्री भीष्मराज आङदेम्बेको जन्म पाँचथरको नवमीडाँडामा २०२१ साल चैत २२ गते भएको हो । उहाँले विद्यालय तहको पढाई भारतको कालिम्पोङबाट पूरा गर्नुभयो । त्यसपछि नेपाल ल क्याम्पसमा भर्ना भएका आङदेम्बेले बीएल पास गर्नुभएको छ ।
१६ वर्षको हुँदा नै नेपाली कांग्रेस पाँचथरको जिल्ला कार्य समिति सदस्य भएका आङदेम्बे, २०४१ सालमा नेपाल विद्यार्थी संघको केन्द्रीय सदस्य र २०५२/०५३ सालमा तरुण दलको केन्द्रीय सदस्य हुनुभयो ।
उहाँ २०४८ सालमा जिल्ला विकास समिति पाँचथरको सदस्य पनि बन्नुभयो । तीनपटक नेपाली कांग्रेसको केन्द्रीय सदस्य भएका आङदेम्बे २०७० सालको संविधानसभा चुनावमा पाँचथर क्षेत्र नम्बर २ बाट विजयी हुनुभएको हो । २०५६ र २०६४ को चुनावमा उहाँ पराजित हुनुभएको थियो । २०७४ सालको संसदीय चुनावमा पनि उहाँ पाँचथर क्षेत्र नम्बर १ बाट पराजित हुनु भएको थियो ।
उहाँले विभिन्न समयमा गरी झण्डै तीन वर्ष जेल जीवन बिताउनुभएको छ ।