नेपाली कांग्रेसका नेता देउकुमार थेवेको जन्म विसं २०२१ साल मंसिर २९ गते ताप्लेजुङको आम्वेगुदिनमा भएको थियो । २०३६ सालदेखि विद्यार्थी आन्दोलनबाट राजनीतिमा सक्रिय थेवे २०३९ मा ताप्लेजुङबाट झापा झर्नुभएको थियो । 
उहाँ २०४१ सालदेखि नेपाल विद्यार्थी संघको राजनीतिमा सक्रिय हुनुभयो । २०४६ सालमा कुमारखोट गाविसको उपाध्यक्ष बन्नुभयो । त्यस्तै २०४९ सालमा भएको स्थानीय चुनावमा गाविस अध्यक्षमा निर्वाचित भएका थेवे पार्टीको नवौँ महाधिवेशनमा क्षेत्रीय सभापति हुनुभएको थियो ।
२०५४ सालको स्थानीय चुनावमा पुन: गाविस अध्यक्षमा निर्वाचित हुनुभएको थियो । कांग्रेसको जिल्ला उपसभापति हुँदै महासमिति सदस्यसम्म पुग्नुभएका थेवेले ताप्लेजुङबाटै एसएलसी उत्तीर्ण गर्नुभएको हो । 
२०७४ मा झापा क्षेत्र नम्बर ४ मा उम्मेदवार बन्नुभएका थेवे पराजित हुनुभएको थियो ।