नेपाली कांग्रेसका नेता रामहरि खतिवडाको जन्म २०२६ साल पुष २४ गते ओखलढुङ्गाको तत्कालीन थाक्ले गाविस वडा नम्वर २ मा भएको हो । उहाँका बुबाको नाम जीवनाथ र आमाको नाम यशोदा खतिवडा हो ।
राजनीतिशास्त्रमा स्नातकोत्तर र कानूनमा स्नातक पास गरेका खतिवडा एसएलसी उत्तीर्ण गरेपछि काठमाडौं पसेर २०४२ सालदेखि राजनीतिमा लाग्नु भएको हो ।
तत्कालीन अवस्थामा प्रतिबन्धित रहेको नेपाली कांग्रेसका नेता कृष्णप्रसाद भट्टराईको संगतले राजनीतिमा लागेका खतिवडा भट्टराईलाई आदर्श मान्नुहुन्छ ।
२०४५ सालमा नेपाली कांग्रेस, ओखलढुङ्गाका कार्यसमिति सदस्य चुनिएका खतिवडा नेपाली कांग्रेसको महासमिती सदस्यसमेत हुनुहुन्थ्यो ।
उहाँ २०६१ सालमा तत्कालीन राजा ज्ञानेन्द्र शाहले सत्ताको बागडोर हातमा लिएपछि त्यसको बिरोध गर्ने क्रममा उहाँ ६ महिना हिरासतमा बस्नुभएको थियो ।
दोस्रो संविधानसभा २०७० सालको विजयी खतिवडा २०७४ सालको संसदीय चुनावमा भने ओखलढुंगा क्षेत्र नम्बर १ बाट पराजित हुनु भएको थियो ।
