चित्रलेखा यादवको जन्म वि.स. २०२२ जेठ १५ गते यमुनाप्रसाद यादव तथा माता रामरतिया यादवको पहिलो सन्तानको रूपमा सिराहाको नहरनिया गाउँमा भएको हो । केटीको सानै उमेरमा बिहे गरिदिने मधेसको तत्कालीन समाजमा चित्रलेखालाई उहाँका बुवाले राम्रो शिक्षा दिनुभयो ।
कक्षा आठमा पढ्दा राजनीति सुरु गर्नुभएकी चित्रलेखा पछि त्रिभुवन विश्वविद्यालयको नेविसंघ ईकाइको कोषाध्यक्ष समेत हुनुभयो । पछि उहाँ उपसभामुख पनि हुनुभयो । राजा ज्ञानेन्द्रले निर्वाचित प्रतिनिधि सभा विघटन गरेपछि उपसभामुखको हैसियतले सडकमै प्रतिनिधि सभा बैठक बोलाएर उहाँ चर्चित हुनुभयो ।
१८ महिना शिक्षामन्त्रीसमेत हुनुभएकी उहाँले शिक्षाले नै देशमा परिवर्तन गर्न सकिने भन्दै यसैलाई चुनावी एजेण्डा बनाउनुभएको छ । यस्तै उहाँले हरेक क्षेत्रमा ५० प्रतिशत महिलाको सहभागिता हुनुपर्ने माग समेत राख्दै आउनुभएको छ ।
