पूर्व राजपा नेपालको अध्यक्ष मण्डलका सदस्य एव्म अहिले जनता समाजवादी पार्टी (जसपा) का नेता राजकिशोर यादवको जन्म सिरहाको क्षेत्र नम्बर ४ मा पर्ने नरहा गाउँपालिका ३, चोहर्वामा २०३० सालको भदौ ७ गते भएको हो ।
सिरहाको जनता माध्यमिक विद्यालय चोहर्वाबाट एसएलसी र भारतको चण्डिगढ पञ्जावबाट एयर इन्जिनियरिङ गर्नुभएका यादव २०६० सालबाट राजनीतिक क्षेत्रमा प्रवेश गर्नुभएको हो । उपेन्द्र यादवको नेतृत्वमा सबै मधेशवादी पार्टी र स्वतन्त्र मधेशीहरुको साझा संगठनको रुपमा स्थापना भएको मधेश अधिकारवादी फोरम, मधेशी जनअधिकार फोरमबाट २०६० सालमा उहाँ सक्रिय हुनु भएको थियो ।
त्यसलगत्तै २०६३ सालको मधेश आन्दोलनमा सक्रिय हुनुभएका उहाँ २०६४ को संविधानसभामा सिरहाको तत्कालीन क्षेत्र नम्बर ६ बाट फोरमबाटै विजयी हुनु भएको थियो । पछि उहाँ उपेन्द्र यादवसँग फुटेर विजयकुमार गच्छदारको लोकतान्त्रिक फोरम हुँदै जयप्रकाश गुप्ताको गणतान्त्रिक फोरममा पुग्नुभयो ।
२०६८ सालमा जयप्रकाश गुप्ता भ्रष्टचारको अभियोगमा जेल परेपछि राजकिशोर यादव फोरम गणतान्त्रिकको अध्यक्ष बन्नुभयो । अध्यक्ष भएको केही समयमै उहाँ सूचना तथा सञ्चार मन्त्री पनि बन्नुभयो ।
२०७० सालको चुनावमा सिरहा क्षेत्र नम्बर ४ बाट नेपाली कांग्रेसका गणेश मण्डलसँग पराजित हुनुभएको थियो । उहाँको नेतृत्वमा रहेको दलले सामानुपतिकतर्फ एक सिट मात्रै पाएपछि उहाँले आफ्नै श्रीमतीलाई सभासद बनाउनु भएको थियो । यो निर्णयका कारण पार्टीमा उहाँले चर्को आलोचना खेप्नु परेको थियो । पार्टी नै संकटमा पर्दै गएकाबेला मधेशवादी दलको एकतासँगै राजपाको स्थापना भएको र उहाँ अध्यक्ष मण्डलको सदस्य बन्नुभयो । 
२०७४ सालको संसदीय चुनावमा सिरहा क्षेत्र नम्बर ४ बाट विजयी यादव अहिले भने उपेन्द्र यादव नेतृत्वको जसपामा हुनुहुन्छ ।