लोकतान्त्रिक समाजवादी पार्टी (लोसपा) का नेता महन्थ ठाकुरको जन्म २००४ सालमा महोत्तरीको इकारियामा भएको हो ।
राजनीतिक थलोका रुपमा लामो समय सर्लाहीमा बिताएका ठाकुर २०६४ र २०७० सालको चुनावमा भने सर्लाही ६ बाट पराजित हुनु भएको थियो । २०६४ सालमा उहाँ तत्कालीन मधेसी जनाधिकार फोरमका उम्मेदवार शिवपूजन रायसँग पराजित हुनु भएको थियो भने २०७० सालको चुनावमा सर्लाही ६ बाट उठेका ठाकुर कांग्रेसका अमरेशकुमार सिंहसँग पराजित हुनु भएको थियो । 
२०७४ सालको चुनावमा उहाँलाई समानुपातिकमा सिफारिस गरिएको थियो तर सूची सच्याउने क्रममा ठाकुरले प्रत्यक्ष उम्मेदवार बन्ने निर्णय गर्नुभएको थियो । यसअघिका चुनावमा उम्मेदवार बनेका ठाकुर मतदानमा भने सहभागी हुनु भएको थिएन । २०७० को चुनावमा ठाकुरले उम्मेदवार भए पनि आफँैलाई भोट दिनु भएन । 
नेपाली कांग्रेस छाडेर तराई मधेस लोकतान्त्रिक पार्टी (तमलोपा) गठन गरेका ठाकुर अध्यक्ष हुनुहुन्थ्यो । उहाँले स्नातकोत्तर सम्मको अध्ययन पूरा गर्नु भएको छ ।
२०७४ सालको चुनावमा राष्ट्रिय जनता पार्टी (राजपा) को अध्यक्ष मण्डलका नेताका रुपमा उहाँले महोत्तरी क्षेत्र नम्बर ३ बाट जित हासिल गर्नु भएको थियो । आहिले भने उहाँ आफ्नो अध्यक्षतामा रहेको लोसपासँग आबद्ध हुनुहुन्छ ।