पूर्व राष्ट्रिय जनता पार्टी (राजपा)का अध्यक्ष मण्डलका नेता एवम् अहिलेका नेपाल समाजवादी पार्टी (नेसपा) का अध्यक्ष महिन्द्रराय यादवको जन्म विसं २०११ साल वैशाख २ गते सर्लाहीको हरिपुर्वामा भएको हो । उहाँको बुवाको नाम शुभकरण यादव र आमाको नाम पुलियादेवी यादव हो ।
२०४४ सालदेखि मधेश केन्द्रित दलबाटै राजनीति गरिरहनु भएका नेता राय २०५१ सालमा नेकपा एमालेबाट सर्लाही १ मा विजयी हुनु भएको थियो । मधेश आन्दोलनसँगै तमलोपामा प्रवेश गर्नु भएका नेता राय २०६४ सालमा भएको संविधानसभा चुनावमा सर्लाही क्षेत्र नम्बर ५ मा सदभावना पार्टीका उम्मेदवार खोभारी रायसँग पराजित हुनुभएको थियो ।
एसएलसी पास गर्नुभएका नेता रायले २०७० सालको दोस्रो संविधान सभा चुनावमा तमलोपाको तर्फबाट सर्लाही क्षेत्र नम्बर ५ मा विजयी हुनुभयो ।
कुनै बेला तराई मधेश लोकान्त्रिक पार्टीको सह–अध्यक्षको भूमिकामा रहनु भएका नेता रायलाई तराई मधेश केन्द्रित दलहरु एक ठाउँमा उभिएपछि महामन्त्रीको पद दिइएको थियो ।
पार्टी भित्र केही नेताहरुबीच विवाद सुरु भएपछि स्थानीय तह चुनावको मुखैमा उहाँले राजपा छोडेर नेकपा एमालेलाई सहयोग गर्नुभयो । नेता राय धेरै समयसम्म एमालेमा पनि अडिन सक्नु भएन । उहाँ फेरि नेपाली कांग्रेसमा प्रवेश गर्नुभयो र २०७४ सालको प्रतिनिधिसभा सदस्यका लागि सर्लाही २ बाट कांग्रेसको टिकट पाएर विजयी पनि हुनुभयो ।
पटकपटक ठूला मन्त्रालयको जिम्मेवारी पाइसक्नु भएका नेता रायले अहिले भने आफ्नै अध्यक्षतामा नेसपा गठन गर्नु भएको छ ।
