नेपाली कांग्रेसका नेता तथा पूर्वमन्त्री सुरेन्द्र चौधरीको जन्म २०१५ साल भदौ २७ गते पर्साको पथरैयामा भएको हो । उहाँका बुवाको नाम रामदयाल चौधरी र आमाको नाम लक्ष्मीदेवी हो ।
चौधरीले अंग्रेजी साहित्यमा एमए र अन्तर्राष्ट्रिय अर्थशास्त्र विषयमा स्नातक गर्नुभएको छ । विभिन्न समयमा गरी १४ पटक पक्राउ परेका चौधरीले ८ वर्ष जेलमा बिताउनु भएको छ । २०३३ सालदेखि उहाँले विभिन्न कलेजमा प्राध्यापनको कामसमेत गर्नुभयो ।
उहाँको बुवा रामदयाल चौधरी कांग्रेसको मुक्ति सेनामा भएकाले उहाँलाई सानै उमेरदेखि राजनीतिमा लाग्न प्रेरणा मिल्यो । नेपाली कांग्रेसको केन्द्रीय सदस्य समेत बन्नुभएका चौधरीले २०२७ सालमा नेपाल विद्यार्थी संघमा आबद्ध भएर राजनीति प्रारम्भ गर्नु भएको हो ।
उहाँ २०४८, २०५१ र २०५६ सालको चुनावमा पर्सा क्षेत्र नम्बर ३ बाट प्रतिनिधिसभामा निर्वाचित हुनुभएको थियो । २०४८, २०५२ र २०५६ सालमा गरी तीनपटक मन्त्री हुनुभयो । उहाँ वाणिज्य तथा आपूर्ति र विज्ञान तथा प्रविधि मन्त्री हुनु भएको थियो ।
पहिलो संविधानसभा चुनावमा पर्सा ४ बाट पराजित भएका चौधरी २०७० सालमा भएको दोस्रो संविधान सभामा भने विजयी हुनु भएको थियो । तर, २०७४ सालको संसदीय चुनावमा भने उहाँ पर्सा क्षेत्र नम्बर ३ बाट पराजित हुनु भएको थियो ।
