वाग्मती प्रदेशका मुख्यमन्त्री राजेन्द्रप्रसाद पाण्डेको जन्म वि.स. २०१३ जेठ २९ मा धादिङको गजुरीमा भएको हो । पाण्डे विद्यार्थी जीवनदेखि नै राजनीतिमा सक्रिय हुनुहुन्छ । त्रिभुवन विश्वविद्यालयबाट ग्रामीण विकासमा एमए गर्नुभएका पाण्डे २०३४ सालदेखि २०४२ सालसम्म शिक्षण पेशामा संलग्न हुनुहुन्थ्यो । २०३२ सालमा सरस्वती क्याम्पसमा विद्यार्थी आन्दोलनको नेतृत्व गर्दा जेल परेपछि उहाँ सक्रिय राजनीतिमा लाग्नुभएको हो । जेलमा उहाँको झापाली आन्दोलनका राजबन्दीसँग भेट भयो । त्यहींबाट झापाली आन्दोलनको समर्थन गर्दै सक्रिय राजनीतिमा लाग्नुभयो ।
२०३३ सालमा केन्द्रीय कारागारमा कम्युनिष्ट पार्टीको सदस्यता लिनुभएका पाण्डेले २०३४ सालमा नेपाल राष्ट्रिय शिक्षक संगठनको संस्थापक सहित दुई कार्यकाल धादिङ जिल्ला अध्यक्ष भएर काम गर्नुभयो । २०३६ साल कात्तिकमा जिल्लामा पार्टी स्थापना गरेर उहाँले ८ वर्षसम्म सचिव पदमा काम गर्नुभयो ।
उहाँ २०४३ मा जिल्ला पञ्चायतको सभापति हुनुभयो । यस्तै २०५० सालमा नेकपा एमालेको अञ्चल सचिव र २०५५ मा केन्द्रीय सदस्य बन्नुभयो । उहाँ लगातार निर्वाचित हुने नेतामा पर्नुहुन्छ । धादिङबाट २०४८, २०५१, २०५६ र २०७० को प्रतिनिधि सभा सदस्य निर्वाचित भइसक्नुभएको छ । यस्तै उहाँले स्थानीय विकास मन्त्रालयको जिम्मेवारी पनि सम्हालिसक्नुभएको छ ।
चार पटक प्रतिनिधि सभा सदस्य भइसक्नुभएका उहाँ २०७४ को निर्वाचनमा भने मुख्यमन्त्री बन्ने उद्देश्यले प्रदेश सभामा फर्किनुभएको थियो । धादिङ १ ‘क’बाट वाग्मती प्रदेश सभामा निर्वाचित भए पनि डोरमणि पौडेल मुख्यमन्त्री बन्नुभयो । एमाले विभाजन भएपछि उहाँले नेकपा एकीकृत समाजवादी रोज्नुभयो र वाग्मती प्रदेशको मुख्यमन्त्री बन्ने अवसर जुर्यो ।
